სვანეთში, ლეხზირის ტერიტორიაზე, მყინვარიდან მასა ჩამოიშალა.ადგილზე მობილიზებულები არიან სამაშველო სამსახურის წარმომადგენლები და შესაბამისი სპეციალისტები, რომლებიც მყინვარის ჩამოშლის შედეგად არსებულ ვითარებას სწავლობენ.
„მყინვარია ჩამონგრეული. არის თუ არა ვინმე მოყოლილი, არავინ იცის. მობილიზებულია სამაშველო სამსახურის წარმომადგენლები. სავარაუდოდ დიდი მასაა ჩამოწოლილი“, – აღნიშნა საპარლამენტო უმრავლესობის წევრმა ვიქტორ ჯაფარიძემ.
მისივე თქმით, აღნიშნული მყინვარი მოსახლეობასთან ახლოს არ არის და ტურისტულადაც ნაკლებად დატვირთული ზონაა.
გარემოს დაცვისა და სოფლის მეურნეობის სამინისტროს გარემოს ეროვნული სააგენტოს ინფორმაციით, მყინვარ ლეხზირზე არსებული სიტუაციის შესწავლის მიზნით სააგენტოს სპეციალისტები ადგილზე იმყოფებიან.
„სავარაუდოდ, საქმე გვაქვს გლაციოლოგიურ პროცესებთან (წლის თბილ პერიოდში მყინვარის ინტენსიურ დნობასთან ) , რომელიც ბუნებაში ხშირად ხდება.
ამ ეტაპზე დროებით ჩაკეტილია ხეობაში შესასვლელი გზა ვიდრე სპეციალისტებისგან ინფორმაცია არ გვექნება“, – ნათქვამია ინფორმაციაში.