ზუგდიდის ერთ-ერთ საჯარო სკოლაში სკანდალური ფაქტი მოხდა: უფროსკლასელმა ბიჭებმა მათზე უმცროსი ბიჭი აითვალწუნეს, რომელსაც პერიოდულად დასცინოდნენ, ეს ყველაფერი კი სკოლის უკან, დამხმარე ნაგებობაში მისი შეტყუებით დასრულდა, სადაც მუქარით გაახდევინეს ტანსაცმელი და გაუპატიურებითაც დაემუქრნენ.
“ოდიშინიუსის” ცნობით, ზოგადადა, ეს ამ სკოლაში პირველი შემთხვევაა არა, როცა უფროსკლასელები მათზე დაბალკლასელებზე ფიზიკურად და ფსიქოლოგიურად ძალადობენ.
ზემოთხსენებული შემთხვევა გაკვეთილების პროცესში მოხდა, რაც იმას ნიშნავს, რომ როგორც ბულინგის მსხვერპლი, ასევე მასზე მოძალადე უფროსკლასელები გაკვეთილზე არ იმყოფებოდნენ, თუმცა, სკოლის ტერიტორია არ დაუტოვებიათ.
ეს კი, თავის მხრივ იმას ნიშნავს, რომ მანდატურები მხოლოდ სკოლის ჭიშკარს მეთვალყურეობენ, რომ ვინმე არ გავიდეს, ხოლო ე.წ. “საბირჟაო” ან “საბულინგო” თავშეყრის ადგილები ან საერთოდ ყურადღების მიღმა რჩებათ, ან კიდევ, სათანადო ყურადღებას არ აქცევენ.
იგივე ითქმის სკოლის ადმინისტრაციასა და პედკოლექტივზეც, განსაკუთრებით, დამრიგებლებზე.
სხვათა შორის, ეს კონკრეტული სკოლა ამ მხრივ გამონაკლისი არ არის. ჩვენი ინფორმაციით, დაწყებულია გამოძიება. რაც შეეხება ბულინგის მსხვერპლს, ის ფსიქორეაბილიტაციას გაივლის და სავარაუდოდ, სხვა სკოლაში გადაიყვანენ.