აშშ-ის პრეზიდენტის სპეციალური წარმომადგენელი სტივ უიტკოფი მოსკოვში, „ვნუკოვო-2“ აეროპორტში დაეშვა.სტივენ უიტკოფს ვნუკოვოს აეროპორტში დახვდა რუსეთის პირდაპირი ინვესტიციების ფონდის ხელმძღვანელი კირილ დმიტრიევი.

ამასთან, კრემლის პრესსპიკერის, დიმიტრი პესკოვის თქმით, ვლადიმერ პუტინსა და ტრამპის სპეციალურ წარმომადგენელს შორის შეხვედრა საღამოს 17:00 საათის შემდეგ დაიწყება. განხილული იქნება უკრაინის წარმომადგენლებთან შეხვედრის დროს წამოჭრილი საკითხები.

კვირას აშშ-სა და უკრაინის დელეგაციებმა ფლორიდაში მოლაპარაკებები გამართეს. ამერიკულ მხარეს წარმოადგენდნენ უიტკოფი, ტრამპის სიძე ჯარედ კუშნერი და სახელმწიფო მდივანი მარკო რუბიო. რუბიომ მოლაპარაკებები სასარგებლო და პროდუქტიული უწოდა, თუმცა აღნიშნა, რომ ჯერ კიდევ ბევრი სამუშაოა გასაკეთებელი.