ახალგაზრდა იურისტთა ასოციაციის ცნობით, სტრასბურგის სასამართლოში რუსული კანონის საქმეში International Network of Civil Liberties Organizations-ის წევრებმა მესამე მხარედ ჩართვა მოითხოვეს და წერილობითი პოზიცია წარადგინეს. პოზიცია სამოქალაქო თავისუფლებების ორგანიზაციების საერთაშორისო ქსელის წევრმა 7-მა არასამთავრობო ორგანიზაციამ წარადგინა.

საია-ს ცნობით, აღნიშნული ორგანიზაციების ერთობლივი წერილობითი პოზიციის მიხედვით, ამ საქმეში განსახილველი კანონის მსგავსი კანონმდებლობები სამოქალაქო საზოგადოებაზე შეუქცევად, უარყოფით გავლენას ახდენს.

“არასამთავრობო ორგანიზაციების ერთობლივი წერილობითი პოზიციის მიხედვით, სამოქალაქო საზოგადოების საქმიანობის შემზღუდველი კანონმდებლობა მსოფლიოს სხვადასხვა ქვეყანაში მიიღეს. ყველა შემთხვევაში, სამიზნე ის ჯგუფები ან ინდივიდუალური აქტივობები იყო, რომლებიც მოქმედი მთავრობის პოლიტიკას აკრიტიკებდა. შესაბამისად, წერილობითი პოზიციის მიზანია, წარმოაჩინოს მთავრობების მიერ, ადამიანის უფლებათა საერთაშორისო სამართლის დარღვევით, განსხვავებული აზრის ჩასახშობად გამოყენებული მრავალფეროვანი მეთოდები”. – წერს საია.