რუსუდან თევზაძემ პარტია გახარია საქართველოსთვის დატოვების თაობაზე სოციალურ ქსელში დაწერა და განმარტა, რომ პარლამენტის მანდატზე უარის თქმა და პარტიის დატოვება მოქალაქეობრივად სწორი გადაწყვეტილებაა მისი შვილებისა და მათი თაობის მომავლის სასარგებლოდ.
“მოგეხსენებათ, რომ 2021 წლიდან ვარ პარტია გახარია საქართველოსთვის პოლიტსაბჭოს წევრი და განათლებისა და კულტურის მიმართულების კურატორი. სწორედ, პოლიტიკური პარტიის წევრის სტატუსით ვცდილობდი, ქვეყნისთვის სასიკეთო საქმეების კეთებას.
მოგეხსენებათ ისიც, რომ მაქვს დეპუტატის მანდატი, რომელიც კოლეგებთან და მეგობრებთან, რთული და წინააღმდეგობებით აღსავსე ერთობლივი მუშაობით მივიღე.
თუმცა, დღეს და ახლა, საქართველოსთვის უკიდურესად მძიმე საშინაო და საგარეო გამოწვევების ფონზე, მივიღე ადამიანურად ურთულესი, მაგრამ ვფიქრობ მოქალაქეობრივად სწორი გადაწყვეტილება, ჩემი შვილებისა და მათი თაობის მომავლის სასარგებლოდ. უარს ვამბობ პარლამენტის მანდატზე და ვტოვებ პარტიას.
ხმამაღლა და მკაფიოდ ვაცხადებ, რომ ჩემი გადაწყვეტილება, არცერთ შემთხვევაში, არ არის მიმართული პოლიტიკური ძალის გახარია საქართველოსთვის წინააღმდეგ. ჩემი კოლეგები, ჩემთვის კვლავაც რჩებიან მეგობრებად და ჩემთვის პატივსაცემ პროფესიონალ ადამიანებად და ვუსურვებ მათ წარმატებას ამ გზაზე.” წერს რუსუდან თევზაძე სოციალურ ქსელში.
ცნობისთვის, 20 ოქტომბერს ცნობილი გახდა, რომ პარტიამ გახარია საქართველოსთვის პარლამენტის და საკრებულოს მანდატების გამოყენების გადაწყვეტილება მიიღო.