აშშ-ს ფედერალურმა სასამართლომ პრეზიდენტ დონალდ ტრამპის ადმინისტრაციის მიერ ჰარვარდის უნივერსიტეტისთვის მილიარდობით დოლარის ოდენობის დაფინანსების შემცირების გადაწყვეტილება გააუქმა.
მოსამართლე ალისონ ბოროუზმა დაადგინა, რომ მთავრობამ უნივერსიტეტის სიტყვის თავისუფლების უფლება დაარღვია, როდესაც მას კვლევითი გრანტები დაახლოებით $2 მილიარდით შეუმცირა.
თეთრმა სახლმა განაცხადა, რომ გადაწყვეტილებას გაასაჩივრებს. ადმინისტრაციის თქმით, ბოროუზი ბარაკ ობამას მიერ დანიშნული “აქტივისტი მოსამართლეა”, რომელიც ტრამპის გადაწყვეტილებებს ყოველთვის ეწინააღმდეგება.
ცნობისთვის, აპრილში დაფინანსების შემცირების მიზეზად ტრამპის ადმინისტრაციამ უნივერსიტეტში არსებული ანტისემიტიზმი, “რადიკალური მემარცხენეობა” და რასობრივი მიკერძოება დაასახელა.
84-გვერდიან გადაწყვეტილებაში ბოროუზმა აღნიშნა, რომ ჰარვარდს მეტი უნდა გაეკეთებინა ანტისემიტიზმთან ბრძოლისათვის, რომელიც, მისი თქმით, ბოლო წლებში “ვირუსულად მოედო” ინსტიტუტს, თუმცა, დასძინა, რომ დაფინანსების შემცირებისას ანტისემიტიზმთან ბრძოლა ტრამპის ადმინისტრაციის “ნამდვილი მიზანი” არ იყო.
მისი თქმით, მთავრობამ “ანტისემიტიზმი ქვეყნის წამყვან უნივერსიტეტებზე იდეოლოგიურად მოტივირებული თავდასხმისთვის გამოიყენა”.