რუსთაველის გამზირზე და მიმდებარედ, საპროტესტო აქციაზე პოლიციამ, სავარაუდოდ, 9 პირი დააკავა. დაკავებულთა შორის არის პარტია „ახლების“ წარმომადგენელი, შუშანა მაცაბერიძე.
აქციის მონაწილეებს რუსთაველის გამზირის გადაკეტვა სურდათ, რისი საშუალებაც მათ პოლიციამ არ მისცა. სწორედ ამ დროს დააკავეს სამართალდამცავებმა აქციის მონაწილეები.
აღსანიშნავია, რომ ისინი აქციას თავდაპირველად პარლამენტთან მართავდნენ, რის შემდეგადაც რუსთაველის თეატრისკენ გადმოინაცვლეს. აქცია თეატრთან ამ წუთებშიც გრძელდება.
მანამდე კი, სინდისის პატიმრების სასამართლო პროცესებისა და პარლამენტში ე.წ. წულუკიანის კომისიის დასკვნის განხილვის პარალელურად, რუსთაველის გამზირზე საპროტესტო აქცია მიმდინარეობდა, პოლიციასა და დემონსტრანტებს შორის შეხლა-შემოხლა რამდენჯერმე მოხდა.
როგორც ყოველთვის მსგავსი აქციების დროს, პოლიციელები განსაკუთრებული უხეშობით გამოირჩეოდნენ აქციის ახალგაზრდა მონაწილეების მიმართ.
პარლამენტის წევრებს ტერიტორიის დატოვება შეძახილების “მონებო!”, “რუსებო!” ფონზე უწევდათ.