30 აგვისტოს ლვოვში უკრაინის ყოფილი პარლამენტის სპიკერი ანდრეი პარუბი მოკლეს. ადგილობრივი მედიის ინფორმაციით, თავდამსხმელი კურიერის ფორმაში მივიდა, ჩაფხუტითა და ჩანთით, და რამდენიმე გასროლის შემდეგ ელექტროსკუტერით გაიქცა.

პრეზიდენტმა ვოლოდიმირ ზელენსკიმ მომხდარს „სასტიკი მკვლელობა“ უწოდა და აღნიშნა, რომ უკვე დაკავებულია ერთი ეჭვმიტანილი. მისი თქმით, „პირველი ჩვენებები მიღებულია“ და გამოძიება აქტიურად მიმდინარეობს.

პარუბი ერთ-ერთი გამორჩეული ფიგურა იყო უკრაინულ პოლიტიკაში. იგი მონაწილეობდა 2004 წლის „ნარინჯისფერ რევოლუციაში“, 2014 წლის „მაიდნის“ თვითდაცვის ხელმძღვანელი იყო და 2016-2019 წლებში უკრაინის უმაღლესი რადას სპიკერის პოსტს იკავებდა.

ფრანგული გამოცემა Le Monde-ის შეფასებით, პარუბი წარმოადგენდა უკრაინული ნაციონალიზმის ერთ-ერთ სიმბოლოს და პროევროპულ მოძრაობაში მნიშვნელოვან როლს თამაშობდა.

მკვლელობის მოტივი ჯერჯერობით უცნობია. გამოძიება სამხედრო დანაშაულისა და ტერორისტული აქტის მუხლით გრძელდება.