“კადიროვის აგენტები საქართველოში”, – ამ სათაურით აქვეყნებს ვიდეომიმართვას “იუთუბის” საკუთარ არხზე რამზან კადიროვის ყველაზე დიდი კრიტიკოსი ბლოგერის ტუმსო აბდურახმანოვის ძმა, რომელიც ამბობს, რომ საქართველოში, კერძოდ, პანკისის ხეობაში “მისიონერული მიზნით” ჩასვლას გეგმავს კადიროვთან დაახლოებული პირი ტაჰირ დუიშვილი, რომელმაც ინტერნეტის ჩეჩნური სეგმენტისთვის აუდიოჩანაწერი გაავრცელა. ვიდეოს ავტორი ამბობს, რომ ტაჰირ დუიშვილი ჩეჩნეთის მოქმედ მუფტთან დაახლოებული პირია და მისი მითითებით მოქმედებს.
↘️ ბლოგერის თქმით, დაუშვილი პანკისის ხეობაში მცხოვრებ ჩეჩნებს აგდებულად მოიხსენიებს, “გაუზრდელებს” უწოდებს და ამბობს, რომ ხეობაში აპირებს შეხვდეს ხალხს, რომლებსაც ძალიან უნდათ რუსეთის ხელისუფლების მსახურ ჩეჩნებთან დაახლოება და მათი ხილვა ხეობაში.
↘️ აბდურახმანოვი აცხადებს, რომ პანკისის ხეობაში დუიშვილის ჩასვლამ, შესაძლოა, პრობლემები შეუქმნას იქ მცხოვრებ ჩეჩნებს, რომლებსაც საქართველო უყვართ, მაგრამ პრობლემები აქვთ პუტინის რეჟიმთან რუსეთში, მათ შორის, ჩეჩნეთის ტერიტორიაზე.
↘️ აბდურახმანოვი მიმართავს ქართველ ძალოვნებს და საქართველოს მოსახლეობას, დაიცვან პანკისის ხეობაში მცხოვრებთა ინტერესები და უსაფრთხოება, რადგან ცნობილია, რომ პუტინი მისი ჩანერგილი აგენტების მეშვეობით ხშირად კლავს პოლიტიკურ ოპონენტებს მათ შორის, სხვა სახელმწიფოების ტერიტორიაზეც.
↕️ ვიდეო დაახლოებით ერთი საათის წინ გავრცელდა.
შეგახსენებთ, რომ ტუმსო აბდურახმანოვი რამზან კადიროვის ყველაზე დიდი კრიტიკოსი ბლოგერია, რომელიც ახლა შვედეთს აფარებს თავს. მის შესახებ არაერთხელ გავრცელდა ინფორმაცია, თითქოს მოკლეს, მაგრამ არ დადასტურებულა. ასევე ბლოგერია ამ მასალის ვიდეოში წარმოდგენილი მისივე ძმაც.