ზუგდიდის მერია ბოტანიკური ბაღის რეაბილიტაციისთვის მსოფლიო ბანკისგან სრული თანხის 50 პროცენტს სესხის სახით აიღებს. მერიას მსოფლიო ბანკი სესხს ათი წლის ვადით 11 პროცენტად მისცემს.რაც შეეხება დარჩენილი თანხის 30%-ს, მერია მას გრანტის სახით მუნიციპალური განვითარების ფონდიდან მიიღებს, ხოლო 20 პროცენტს ადგილობრივი ბიუჯეტიდან გადაიხდის. ზუგდიდის მერის, ლაშა გოგიას თქმით, ქალაქში მიმდინარე ინფრასტრუქტურული პროექტების განსახორციელებლად აუცილებელია გარკვული ეკონომიის გაკეთება, რაც ადმინისტრაციული ხარჯებისა და სახელფასო ფონდის შემცირების ხარჯზე მოხდება.ბოტანიკური ბაღის სრული რეაბილიტაციისთვის 11,974,436.72 ლარი დაიხარჯება. ბაღის რეაბილიტაციას სამშენებლო კომპანია „ჯავა“ განახორციელებს, რომელმაც მუნიციპალური განვითარების ფონდის მიერ გამოცხადებულ ტენდერში გაიმარჯვა. კონტრაქტის თანახმად, სამუშაოები დაწყებიდან 18 თვის განმავლობაში უნდა დასრულდეს.