უკრაინის შეიარაღებული ძალების გენერალური შტაბი აცხადებს, რომ საომარი მოქმედებების ეპიცენტრში კვლავ რჩებიან ქალაქები ბახმუტი და მარინკა.

დღევანდელ განახლებაში ნათქვამია, რომ მტერი აგრძელებს ძირითადი ძალისხმევის კონცენტრირებას კუპიანსკის, ლიმანის, ბახმტის, ავდეევკისა და მარინკას მიმართულებებზე – მოხდა 26 შეტაკება.

უწყების ცნობით, გასული დღის განმავლობაში მტერმა 41 საჰაერო დარტყმა განახორციელა და 53 შეტევა მრავალჯერადი სარაკეტო სისტემებიდან.

გენშტაბი ამბობს, რომ ლიმანის მიმართულებით მტერმა შეტევითი ოპერაციები ჩაატარა ბელოგოროვკას მიმართულებით, მაგრამ წარმატებას ვერ მიაღწია, ასევე იყო ავიაიერიშიც.

“ბახმუტის მიმართულებით დღისით მტერმა წარუმატებელი შეტევითი ოპერაციები ჩაატარა ხრომოვოს მიმართულებით. საჰაერო დარტყმები მიაყენა ბახმუტის, ივანოვსკის, ბელაია გორას, ოზარიანოვკასა და ტორეცკის რაიონებს”, – აცხადებს გენშტაბი.

უკრაინული მხარის ცნობით, თავდაცვის ძალების ავიაციამ გასული 24 საათის განმავლობაში 15 დარტყმა მიაყენა მტრის ცოცხალ ძალისა და სამხედრო ტექნიკის კონცენტრაციის უბნებს, აქედან 3 – საზენიტო სარაკეტო სისტემებზე. გენშტაბი ამბობს, რომ გასული დღის განმავლობაში უკრაინამ გაანადგურა რუსეთის ვერტმფრენი Ka-52, 4 “შაჰიდის” ტიპის უპილოტო საფრენი აპარატი და 1 სადაზვერვო დრონი “Zala”.