საქართველოს პრემიერ-მინისტრის, ირაკლი ღარიბაშვილის თქმით, საქართველოს მთავრობა თხილის მოვლა-მოყვანას დაასუბსიდირებს.
როგორც მან მთავრობის სხდომაზე განაცხადა, გადაწყვეტილება, სექტორში არსებული პრობლემების გათვალისწინებით მიიღეს.
ძალიან ბევრი ჩვენი თანამოქალაქეა ჩართული თხილის წარმოებაში. სამწუხაროდ, ფაროსანას ნეგატიური ეფექტი ჯერ კიდევ სახეზეა. 2017 წლიდან შემოვიდა ფაროსანა, ამან გამოიწვია დიდი კლება თხილის წარმოების, წელსაც მაინც და მაინც კარგი მოსავალი არ იყო, ამას ემატება ის, რომ მოთხოვნა შემცირებულია და ფასები დაკლებულია მსოფლიოში მიმდინარე კრიზისიდან გამომდინარე. ყველაფრის გათვალისწინებით ჩვენ გადავწყვიტეთ, წავახალისოთ და ხელი შევუწყოთ ამ სექტორში მომუშავე ფერმერებს. პროგრამა ითვალისწინებს თხილის პირველადი წარმოების ხელშეწყობას, თხილის მოვლა-მოყვანისთვის საჭირო საქონლის სუბსიდირების გზით, ამისთვის პირველ ეტაპზე გამოვყოფთ 20 მილიონ ლარს”, – თქვა ღარიბაშვილმა.