შინაგან საქმეთა სამინისტროში გიორგი მღებრიშვილის გიორგი გახარია ჩაანაცვლებს

ეკონომიკის ყოფილი მინისტრი გიორგი გახარია შინაგან საქმეთა მინისტრი იქნება. ამის შესახებ პრემიერმინისტრმა გიორგი კვირიკაშვილმა დღეს გამართულ საგანგებო ბრიფინგზე განაცხადა, რომელიც მთავრობაში მიმდინარე სტრუქტურულ ცვლილებებს ეხება. "შინაგან საქმეთა სამინისტროს როლი, პოლიციელის პრესტიჟი, დანაშაულთან ბრძოლა და საზოგადოებრივი წესრიგი არის ჩვენი მნიშვნელოვანი პრიორიტეტი და ამ პრიორიტეტის ხაზგასასმელად, მინისტრი, ამავდროულად, დაიკავებს ვიცეპრემიერის პოსტს,"- ამბობს გიორგი კვირიკაშვილი. ამასთან, შინაგან საქმეთა სამინისტროში დღეს მოქმედი საგანგებო სიტუაციების მართვის სააგენტოსა და სახელმწიფო უსაფრთხოებისა და კრიზისების მართვის საბჭოს შერწყმისა და რეორგანიზაციის შედეგად, საგანგებო სიტუაციების მართვის ცენტრი იქმნება, რომელსაც შინაგან საქმეთა მოქმედი მინისტრი გიორგი მღებრიშვილი უხელმძღვანელებს. შეგახსენებთ, რომ გიორგი გახარია ეკონომიკის მინისტრის პოსტს იკავებდა, მისი ადგილი კი პირველმა ვიცეპრემიერმა და ფინანსთა ყოფილმა მინისტრმა დიმიტრი ქუმსიშვილმა დაიკავა. დაგეგმილი საკადრო ცვლილებების შედეგად მთავრობისთვის ნდობის ხელახალი გამოცხადება იქნება საჭირო. საქართველოს კონსტიტუციით, მთავრობის 1/3-ის, ანუ შვიდი მინისტრის შეცვლის შემთხვევაში, მთავრობის შემადგენლობას პარლამენტმა ნდობა ხელახლა უნდა გამოუცხადოს.აღნიშნულთან დაკავშირებით მთავრობის ახალი შემადგენლობის შესახებ ეცნობება საქართველოს პრეზიდენტს, რომელიც 1 კვირის ვადაში პარლამენტში ახალ შემადგენლობას წარადგენს, საკანონმდებლო ორგანო კი ვალდებულია, მთავრობის შემადგენლობის საკითხი ნდობის გამოცხადებასთან დაკავშირებით 7 დღის ვადაში განიხილოს.

შინაგან საქმეთა სამინისტროში გიორგი მღებრიშვილის გიორგი გახარია ჩაანაცვლებს

სიახლეები

რუსეთიდან საქართველოში შემომსვლელთა რაოდენობის ზრდის ფონზე, ექსპერტები შესაძლო რისკებზე საუბრობენ

რუსეთი აგებს ომს, რომელიც მანვე დაიწყო – ურსულა ფონ დერ ლეიენი

ზარქუა ღარიბაშვილზე: მე მაინც მგონია, რომ აქ საქმე გვაქვს გაუგებრობასთან

ბაჩალიაშვილის დედა დღეს, 17:00 საათზე პროკურატურაში დაიბარეს