სახელმწიფო უსაფრთხოების სამსახურში დღეს სპეციალური ბრიფინგი გაიმართა. როგორც სამსახურის უფროსის მოადგილემ ლევან იზორიამ განაცხადა, აღძრულია სისხლის სამართლის საქმე სახელმწიფო ხელისუფლების დამხობის და ხელში ჩაგდებისთვის შეთქმულებასთან დაკავშირებით. 

"სახელმწიფო უსაფრთხოების სამსახურის კონტრდაზვერვის დეპარტამენტის მიერ ჩატარებული ღონისძიებების შედეგად და მედიაში გავრცელებული ინფორმაციის საფუძველზე დაიწყო გამოძიება საქართველოს სისხლის სამართლის კოდექსის 315 მუხლის პირველი ნაწილით, რაც ითვალისწინებს შეთქმულებას სახელმწიფო ხელისუფლების დასამხობად და ხელში ჩასაგდებად," – განმარტა ლევაბ იზორიამ. 

მისივე თქმით, დაწყებული გამოძიების ფარგლებში ჩატარდება ყველა საჭირო ოპერატიული-სამძებრო ღონისძიება და საგამოძიებო მოქმედებები.

სახელმწიფო უსაფრთხოების სამსახური აკონკრეტებს, რომ  გამოძიება  უკრაინული ვებგვერდის wikileaks.center-ის მიერ გავრცელებული ინფორმაციის საფუძველზე დაიწყო. 

შეგახსენებთ, გუშინ უკრაინულმა ვებგვერდმა wikileaks.center-მა   გაავრცელა თითქოსდა საქართველოს ექსპრეზიდენტის, მიხეილ სააკაშვილისა და უშიშროების საბჭოს ყოფილი მდივნის გიგა ბოკერიას საუბრის სტენოგრამა, რომელშიც სააკაშვილისა და ბოკერიას მიერ საქართველოში სახელმწიფო გადატრიალების მომზადების გეგმაზეა საუბარი. როგორც ინფორმაციაშია განმარტებული, სააკაშვილსა და ბოკერიას შორის აღნიშნულთან დაკავშირებით საუბარი სტამბულის ათა-თურქის აეროპორტში 22 ოქტომბერს შედგა. სტატიაში ნახსენებია საქართველოს პრეზიდენტი გიორგი მარგველაშვილიც.