მსოფლიოს კულტურული მემკვიდრეობის დაცვის საერთაშორისო ორგანიზაციის UNESCO-ს ჟურნალმა "მსოფლიო მეკვიდრეობა" (World heritage) ენგურჰესის თაღოვან კაშხალს სპეციალური სტატია მიუძღვნა.
სტატიაში კაშხალი, წარმოდგენილია როგორც მსოფლიო მასშტაბის მონუმენტური ჰიდროსაინჟინრო ნაგებობის თვალსაჩინო ნიმუში, ეროვნული კატეგორიის ინდუსტრიული მემკვიდრეობის ძეგლი.
გამოცემა წერს, რომ ენგურის თაღოვანი კაშხალი მე-20 საუკუნის სამოქალაქო ინჟინრების მიღწევების ერთ-ერთ ყველაზე მომხიბვლელ მაგალითს წარმოადგენს.
„საქართველოს ჩრდილო-დასავლეთით ულამაზესი ნაწილში, მსოფლიო კაშხლებს შორის სიმაღლით მეექვსე და ულამაზესი თაღოვანი კაშხალი ენგური მდებარეობს. ეს იყო ყველაზე მაღალი თაღოვანი ტიპის კაშხალი 2010 წლამდე, სანამ ჩინეთის „სიაოვანის“კაშხლის მშენებლობა დასრულდებოდა. მისი სიმაღლე 292 მეტრს აღწევს. ენგურის თაღოვანი კაშხალი ფუნქციონირებს 1978 წლიდან. აშენების შემდეგ მასზე არ განხორციელებულა ცვლილებები, მისი ნამდვილობა და მთლიანობა სრულად არის შენარჩუნებული რაც გენიალური ინჟინერიის დემონსტრირებას ახდენს“,-აღნიშნულია სტატიაში.
კულტურული მემკვიდრეობის დაცვის ეროვნულ სააგენტოში კი განმარტავენ, რომ ჰიდროსაინჟინრო ნაგებობის მორიგი აღიარება კიდევ ერთხელ ცხადყოფს მის ზოგადსაკაცობრიო ღირებულებას, რაც მნიშვნელოვანი სტიმულია მისი მსოფლიო მემკვიდრეობის ნუსხაში წარსადგენად წამოწყებული გრძელვადიანი სამუშაო პროცესისთვის.
