რუსეთის საგარეო საქმეთა მინისტრის მოადგილის, მიხაილ გალუზინის, ოკუპირებული აფხაზეთის მარიონეტული რეჟიმის ე.წ. საგარეო საქმეთა მინისტრის, ოლეგ ბარციცისა და ოკუპირებული ცხინვალის რეგიონის დე ფაქტო წარმომადგენლის, კონსტანტინ კოჩიევის შეხვედრის შემდეგ გავრცელებული განცხადების თანახმად, მხარეები საქართველოსგან ძალის გამოუყენებლობის შესახებ იურიდიულად სავალდებულო გარანტიებს კვლავ ითხოვენ.
მათი განცხადებით, კონფლიქტის მოგვარება შეუძლებელია გარანტიის გარეშე, რომ თბილისი ოკუპირებული რეგიონების წინააღმდეგ ძალას არ გამოიყენებს.
განცხადებაში ასევე საუბარია ოკუპირებულ აფხაზეთსა და ცხინვალის რეგიონთან ე.წ. სახელმწიფო საზღვრების დადგენასა და შემდგომ დემარკაციაზე.
შეხვედრაზე მხარეებმა სამხრეთ კავკასიაში არსებული ვითარება და რეგიონული უსაფრთხოების საკითხებიც განიხილეს. განცხადებაში დამატებითი დეტალები მითითებული არ არის.