BBC-ს საგამოძიებო ფილმთან დაკავშირებით სუსმა გამოკითხვაზე “საერთაშორისო გამჭვირვალობა – საქართველოს“ დირექტორი ეკა გიგაური დაიბარა. ინფორმაციას ამის შესახებ არასამთავრობო ორგანიზაცია ავრცელებს.
მათი განცხადებით, გიგაურის და სხვა რესპონდენტთა დაბარება აჩენს ეჭვს, რომ სუს-ის მიზანი არა სიმართლის დადგენა, არამედ ზეწოლის გაძლიერებაა იმ ორგანიზაციებზე, რომლებიც ფილმში ხელისუფლების რეპრესიულ პოლიტიკაზე საუბრობენ.
ორგანიზაცია აღნიშნავს, რომ ხელისუფლებას ერთი წელი ჰქონდა, რათა გამოევლინა და დაესაჯა აქციების დარბევაში ჩართული პირები, თუმცა არცერთი პოლიციელი არ დასჯილა, უფლებადამცველებსა და სოლიდარობის ჯგუფების წინააღმდეგ გამოძიება აწარმოებენ ისეთ ბრალდებებში, როგორიცაა პირბადეების და დამცავი საშუალებების შეძენა.
სახელმწიფო უსაფრთხოების სამსახურმა (სუს), BBC-ს საგამოძიებო ფილმთან დაკავშირებით, მოწმის სტატუსით, გამოკითხვაზე დაიბარა „საერთაშორისო გამჭვირვალობა – საქართველოს“ დირექტორი ეკა გიგაური. მან გამოკითხვა მაგისტრი მოსამართლის წინაშე მოითხოვა.
ფილმში ეკა გიგაური იმ რეპრესიულ პოლიტიკაზე საუბრობს, რომელსაც „ქართული ოცნება“ ქართველი ხალხის წინააღმდეგ აწარმოებს. სუს-ის მიერ ფილმში რესპოდენტებად მყოფი ადამიანების, მათ შორის, ეკა გიგაურის გამოკითხვაზე დაბარება აჩენს ძლიერ ეჭვს, რომ მათი მიზანი არა ჭეშმარიტების დადგენა, არამედ ზეწოლის გაძიერებაა უფლებადაცვით ორგანიზაციებზე.
ნაცვლად იმისა, რომ სახელმწიფომ გასცეს დამაჯერებელი პასუხი, თუ რა ქიმიური საშუალებების გამოყენებით ხდებოდა 2024 წლის ნოემბერ-დეკემბრის მშვიდობიანი აქციების დარბევა, სუს-ი გამოკითხვაზე იბარებს იმ ადამიანებს და ორგანიზაციებს, რომლებიც ადამიანის უფლებებს იცავენ. აქვე უნდა ითქვას ისიც, რომ საგამოძიებო ორგანოებს 1 წელი ჰქონდათ იმისთვის, რომ ადამიანების წამებასა და არაადამიანურ მოპყრობაში ჩართული პირები გამოეკვეთათ და პასუხისგებაში მიეცათ, თუმცა ამ დრომდე არცერთი პოლიციელი დასჯილი არ არის. ამის პარალელურად, ვხედავთ, რომ პირბადეების, საწვიმრების და სხვა მსგავსი დამცავი საშუალებების შეძენის გამო ქართული სამოქალაქო ორგანიზაციებისა და სოლიდარობის ფონდების წარმომადგენლები გამოძიების ქვეშ არიან, – ნათქვამია ორგანიზაციის განცხადებაში.