აშშ-ის სახელმწიფო მდივანმა მარკო რუბიომ განაცხადა, რომ აშშ-სა და უკრაინის დელეგაციებს შორის ჟენევაში გამართულ შეხვედრაზე მნიშვნელოვანი პროგრესი დაფიქსირდა, თუმცა შეთანხმებამდე კიდევ რამდენიმე საკითხის დამუშავებაა საჭირო – მათ შორის საუბარია ნატოს როლზე.

რუბიომ აღნიშნა, რომ მისმა გუნდმა „პრეზიდენტ დონალდ ტრამპის მიერ მხარდაჭერილ 28-პუნქტიან სამშვიდობო გეგმაში გადაუჭრელი საკითხების წრე შეამცირა“, თუმცა მოლაპარაკებებს დამატებითი დრო სჭირდება. მისივე თქმით, დოკუმენტი ყოველდღიურად იცვლება, რადგან „ეს არის სამუშაო, ცოცხალი დოკუმენტი“.

სახელმწიფო მდივანმა განმარტა, რომ რიგი თემები, რომლებიც ევროკავშირის ან ნატოს კომპეტენციას ეხება, განცალკევებულია, რადგან ამ საკითხებზე ევროპელი პარტნიორების უსაფრთხოების მრჩევლებთან შეხვედრაა საჭირო.

მისივე თქმით, მოლაპარაკებებში ახლა ყურადღება მიმართულია ორ ქვეყანას შორის ორმხრივ თემებზე.

შემიძლია გითხრათ, რომ საკითხები, რომლებიც ღიად რჩება, გადაულახავი არ არის, უბრალოდ მეტი დრო გვჭირდება, ვიდრე დღეს გვაქვს. გულწრფელად მჯერა, რომ ჩვენ ამას მივაღწევთ, – განაცხადა რუბიომ.

მან ასევე აღნიშნა, რომ იმედოვნებს შეთანხმების მიღწევას ხუთშაბათისთვის, თუმცა გამორიცხული არაა, რომ პროცესმა მეტი დროც მოითხოვოს.

დღეს მნიშვნელოვანი ის არის, რომ ჩვენ მნიშვნელოვან პროგრესს მივაღწიეთ. ჩვენ ნამდვილად წინ წავედით… ძალიან ოპტიმისტურად ვარ განწყობილი, რომ ამას ძალიან გონივრულ ვადაში, ძალიან მალე მივაღწევთ.
იქნება ეს ხუთშაბათი, პარასკევი, ოთხშაბათი თუ მომდევნო კვირის ორშაბათი – გვინდა, რომ ეს მალე მოხდეს, რადგან დღეიდან ამ საკითხთან გამკლავების დრომდე მეტი ადამიანი დაიღუპება, მეტი ნგრევა მოხდება. ჩვენი მიზანია, ეს ომი რაც შეიძლება მალე დასრულდეს, მაგრამ ცოტა მეტი დრო გვჭირდება, – განაცხადა ამერიკელმა მაღალჩინოსანმა.