ევროკომისარი გაფართოების საკითხებში მარტა კოსი 2025 წლის ევროკავშირის გაფართოების პაკეტს უახლოეს დღეებში ევროპარლამენტის საგარეო საქმეთა კომიტეტს წარუდგენს.
ევროპარლამენტის ცნობით, გაიმართება დებატები კანდიდატი და პოტენციური კანდიდატი ქვეყნების პროგრესზე, სადაც განხილული იქნება მათი რეფორმების ტემპი და შესაბამისობა ევროკავშირის მოთხოვნებთან. თითოეული ქვეყნისთვის შემუშავდება რეზოლუციები და რეკომენდაციები, ევროკომისიის შეფასების საფუძველზე.
გავრცელებული ინფორმაციით, 4 ნოემბერს გამოქვეყნდება საქართველოსთან დაკავშირებული ანგარიში, რომელიც, როგორც ევროკავშირის ელჩმა საქართველოში პაველ ჰერჩინსკიმ განაცხადა, იქნება გრძელი და არსებითი დოკუმენტი. ანგარიში დეტალურად აღწერს, რა ცვლილებები მოხდა ქვეყანაში ბოლო ერთი წლის განმავლობაში და როგორ აისახა ეს საქართველოს ევროკავშირის წევრობაზე სწრაფვაზე.
ანგარიშის პრეზენტაცია ბრიუსელში გაიმართება ევროკომისიის ვიცე-პრეზიდენტის კაია კალასის და კომისარი მარტა კოსის მონაწილეობით, ხოლო იმავე დღეს თბილისში პრესკონფერენციას გამართავს ელჩი ჰერჩინსკი, რომელიც საქართველოს პროგრესსა და გამოწვევებზე ისაუბრებს.