საქართველოს ახალგაზრდა იურისტთა ასოციაცია 17 ივლისს სასამართლო პროცესზე მოწმე გდდ-ს თანამშრომლების მიერ გაკეთებულ განცხადებას ჩაფხუტების დანომვრასთან დაკავშირებით განცხადებით ეხმაურება.
აქციებთან დაკავშირებით დაკავებული 11 პირის სასამართლო პროცესზე 17 ივლისს ბრალდების მხარის მოწმეებმა, განსაკუთრებულ დავალებათა დეპარტამენტის (‘გდდ’) თანამშრომლებმა, ლაშა გელაშვილმა და გიორგი გობრონიძემ, განაცხადეს, რომ გდდ-ს ჩაფხუტებზე მითითებული იყო საიდენტიფიკაციო ნომრები. გიორგი გობრონიძემ ასევე მიუთითა, რომ ნომერი ჩაფხუტის უკანა მხარეს იყო მითითებული.
“თუ ჩავთლით, რომ გდდ-ს თანამშრომლებს მაიდენტიფიცირებელი აღნიშვნა აღჭურვილობაზე გაკეთებული აქვთ ისეთი ზომით/ფორმით ან ისეთ ადგილას, სადაც იგი ხილული არ არის გარეშე პირისთვის, ასეთი ფორმით საიდენტიფიკაციო ნომრების მითითება ვერ ჩაითვლება სახელმწიფოს მიერ გატარებულ ეფექტიან პრევენციულ ზომად, რადგანაც იგი ვერ უზრუნველყოფს დამნაშავე პირების ამოცნობას, რაც სპეცრაზმელთა ფორმებზე მსგავსი ნიშნების დატანის მთავარი მიზანი უნდა იყოს.
თუ კი დავუშვებთ, რომ გდდ-ს ზოგიერთი დანაყოფი ატარებს ამომცნობ ნიშნებს, ზოგიერთი კი – არა, გაურკვეველი ხდება, რატომ არ აღუნიშნავთ ეს აქამდე სპეციალურ საგამოძიებო სამსახურს, სახალხო დამცველს ან/და შსს-ს და რატომ არ შეიცავს აღნიშნულ ინფორმაციას შსს-ს ზემოთ განხილული წერილი.
ყოველივე ზემოთ განხილულიდან გამომდინარე, უცნობია, რას გულისხმობდნენ სასამართლო პროცესზე ბრადების მხარის მოწმეები, როდესაც ჩაფხუტის დანომვრაზე მიუთითებდნენ. კითხივის ნიშნებს აჩენს, თუ რატომ ეწინააღმდეგება ეს ინფორმაცია სახელმწიფო უწყებების მიერ აქამდე გაკეთებულ განმარტებებს”, – ვკითხულობთ საია-ს განცხადებაში.
საია-ს თანახმად, მნიშვნელოვანია, გენერალურმა პროკურატურამ, როგორც უწყებამ, რომელიც სპეციალური საგამოძიებო სამსახურის გაუქმების შემდეგ, 2025 წლის 01 ივლისიდან, უნდა იძიებდეს სამართალდამცავთა მიერ ჩადენილ დანაშაულებს, მათ შორის, აქციების კონტექსტში, საზოგადოებას მიაწოდოს სრული ინფორმაცია გდდ-ის თანამშრომლების იდენტიფიკაციასთან დაკავშირებით.