თბილისის საქალაქო სასამართლოში კამერების შეტანა აკრძალეს – ნოდარ მელაძე
ტვ პირველის საინფორმაციო სამსახურის უფროსი, რეპორტიორი ნოდარ მელაძე “ფეისბუქზე” წერს, რომ თბილისის საქალაქო სასამართლოს შენობაში, სადაც 15:00 საათზე ზურაბ გირჩი ჯაფარიძის სასამართლო პროცესი უნდა დაიწყოს, კამერების შეტანა აკრძალეს. ნოდარ მელაძე განმარტებას ითხოვს:
“შენობაში კამერების შეტანა აკრძალეს. ფოიეშიც ვერაფერს ვიღებთ, პრესამსახური არ პასუხობს მედიას.
რას ეყრდნობა ბრძანება კამერების შენობაში აკრძალვაზე? პარლამენტიც კი, წინა დღეს აფრთხილებს მედიას წესის ცვლილებაზე.
არის ეჭვი, ლელა ჭანიამ, ლევან მურუსიძის მეუღლემ გასცა ბრძანება, კამერები არ დამანახოთო და ახლა ყველა ქუჩაში დატოვეს”, – წერს ნოდარ მელაძე და ამატებს, რომ ჟურნალისტებს თავისუფლად გადაადგილების უფლება ეზღუდებათ.