უკრაინის თავდაცვის მინისტრმა, რუსტემ უმეროვმა, თურქეთში, რუსულ მხარესთან გასულ კვირას გამართული მოლაპარაკებების შესახებ ანგარიში პრეზიდენტ ზელენსკის წარუდგინა. ანგარიშის მიხედვით, შეხვედრის ყველაზე დიდ მიღწევად სამხედრო ტყვეების გაცვლის შესახებ მიღწეული შეთანხმება სახელდება [1000-1000-ზე ფორმატით]

როგორც უკრაინის პრეზიდენტის მიერ გავრცელებული ინფორმაციით ირკვევა, უკვე მიმდინარეობს მუშაობა გაცვლის დეტალებზე.

“რუსტემ უმეროვმა, როგორც თურქეთში დელეგაციის ხელმძღვანელმა, წარმოადგინა ანგარიში რუსებთან საუბრის კონკრეტული დეტალების შესახებ. უკრაინულმა დელეგაციამ მოახერხა საუბრის ღირსეულ ჩარჩოებში წარმართვა. რუსეთის მუქარის ყველა მცდელობა უარყოფილი იქნა.

უკრაინა დაჟინებით ითხოვს ცეცხლის სრულ და უპირობო შეწყვეტას ხალხის სიცოცხლის შენარჩუნებისა და დიპლომატიისათვის საჭირო საფუძვლის შესაქმნელად. ცეცხლის შეწყვეტა უნდა იყოს საკმაოდ ხანგრძლივი და გაგრძელების შესაძლებლობით. პარტნიორებთან შეთანხმებული ჩვენი შეთავაზება 30 დღეა. ჩვენ მზად ვართ ამისთვის. ჩვენ ასევე მზად ვართ ლიდერების დონეზე შეხვედრისთვის საკვანძო საკითხების გადასაჭრელად. უკრაინას არ ეშინია რუსეთთან პირდაპირი მოლაპარაკებების და მნიშვნელოვანია, რომ რუსეთის ხელმძღვანელობამ ომი არ გააჭიანუროს” ნათქვამია ზელენსკის განცხადებაში.

მოლაპარაკებები სტამბოლში გასულ კვირას, 16 მაისს გაიმართა.