იურიდიულ საკითხთა კომიტეტის თავმჯდომარე, ანრი ოხანაშვილი, პრემიერმინისტრ კობახიძის მსგავსად ამტკიცებს, რომ რუსული კანონის მიღება “საზოგადოების დაკვეთა” იყო. ოხანაშვილი ასევე აღნიშნავს, რომ პარლამენტი მესამე მოსმენით მას ხვალ განიხილავს.
ის სრულ მხარდაჭერას უცხადებს პოლიციას და ამტკიცებს, რომ სამართალდამცავები პროპორციულად მოქმედებენ. ოხანაშვილის თქმითვე, რუსულ კანონს მესამე მოსმენით კენჭს პლენარულ სხდომაზე ხვალ, 14 მაისს უყრიან.
“ჩვენი საზოგადოების დაკვეთაა გამჭვირვალობის შესახებ კანონპროექტის მიღება, რომ ამ ქვეყანაში საქმიანობა იყოს გამჭვირვალე, რა თანხები შემოდის, როგორ იხარჯება და რა მიზანს ემსახურება. დღესაც ყველას შესაძლებლობა ჰქონდა, თუ ვინმეს რედაქციული შენიშვნები ჰქონდა დაეფიქსირებინა, მაგრამ არც კი მოვიდნენ კომიტეტის სხდომაზე, არც კი შემოვიდნენ ის ხალხი, ვინც კონკრეტულ საკითხებზე აპელირებდნენ და ავრცელებდნენ დეზინფორმაციას. სრული მხარდაჭერა ქართულ პოლიციას, რომელიც მოქმედებს პროპორციულად. აფრთხილებს საზოგადოებას, რომ უკანონო ქმედებები არ განახორციელონ. გუშინაც იყო მოწოდებები, გაფრთხილება, თხოვნა, კანონი არ დაარღვიონ. კანონის დარღვევის შემთხვევაში იქნება პროპორციული ძალა გამოყენებული…
შეურაცხყოფას ნუ აყენებენ ჩვენ საზოგადოებას. აბსოლუტურ უმრავლესობას, რომელმაც გამოუცხადა ნდობა ჩვენ ხელისუფლებას, რომელსაც აქვს სრული ლეგიტიმაცია იმოქმედოს საქართველოს კონსტიტუციის შესაბამისად. ჩვენ ვმოქმედებთ ჩვენი ქვეყნის ინტერესების შესაბამისად, ჩვენი ქვეყნის კონსტიტუციის და ჩვენი ხალხის ინტერესების შესაბამისად…ხვალ იქნება, რა თქმა უნდა, პროცედურულად გათვალისწინებული. იმიტომ, რომ მესამე მოსმენა პლენარულ სხდომაზე იქნება ხვალ. რაც შეეხება მშვიდობიან პროტესტს, საზოგადოებას, ვისაც კონკრეტული საკითხი აღელვებს, ვინც კონკრეტულ საკითხს არ ეთანხმება, მშვიდობიანად, სრული უფლება აქვს გამოხატოს თავისი აზრი. მშვიდობიანი აზრის გამოხატვა და შეკრება არის დაცული,” – ამბობს ოხანაშვილი.
ცნობისთვის, საზოგადოების პროტესტის ფონზე, იურიდიულ საკითხთა კომიტეტმა რუსული კანონი მესამე მოსმენით მიიღო. სხდომა 1 წუთს გაგრძელდა. ოპოზიციას მასზე დასწრების შესაძლებლობა არ ჰქონია. მას “ოცნების” დეპუტატებთან ერთად, მხოლოდ “ევროპელი სოციალისტები” ესწრებოდნენ.