The Insider-ის, 60 Minutes-ისა და Der Spiegel-ის ჟურნალისტურ გამოძიებას, რომელიც “ჰავანის სინდრომსა” და გრუ-ს მიერ ამერიკელი დიპლომატების ჯანმრთელობის დაზიანებას შეეხებოდა, სახელმწიფო უსაფრთხოების სამსახური ეხმაურება. გამოძიება ამბობდა, რომ ერთ-ერთი ასეთი შემთხვევა თბილისშიც დაფიქსირდა, რომლის დროსაც აშშ-ის საელჩოში აშშ-ის იუსტიციის დეპარტამენტის ატაშეს ცოლს დაესხნენ თავს.
უწყება აცხადებს, რომ აღნიშნული ჟურნალისტური გამოძიება ისეთმა კომპეტენტურმა უწყებებმაც კი ეჭქვეშ დააყენეს, როგორიც აშშ-ის ცენტრალური სადაზვერვო სააგენტო და სახელმწიფო დეპარტამენტია. სუს-ი აღნიშნულ რეაგირებას “სავსებით ამომწურავად მიიჩნევს” და ამბობს, რომ “არსებული ვერსიის უსაფუძვლობის ხელახლა მტკიცება საჭირო არ არის.”
გავრცელებულ განცხადებაში ასევე ნათქვამია, რომ “რეგიონში მომატებული გამოწვევების ფონზე, უსაფრთხოება ქვეყანაში დაცულია მაქსიმალურ დონეზე.”
“სახელმწიფო უსაფრთხოების სამსახური ეხმაურება ბოლო პერიოდში კონკრეტულ მედიასაშუალებებში გავრცელებულ ინფორმაციას მსოფლიოს რამდენიმე ქვეყანაში, მათ შორის საქართველოში, ამერიკელი დიპლომატების ჯანმრთელობის დაზიანების შესახებ. ინფორმაციის წყარო კი უცხოური ჟურნალისტური გამოძიება გახდა, რომლის თანახმად, ამერიკელი დიპლომატების მიმართ თითქოს „ჯანმრთელობის ანომალიურ ინციდენტს“ ჰქონდა ადგილი.
მედიასაშუალებებში ინფორმაციის გავრცელების შემდეგ, სახელმწიფო უსაფრთხოების სამსახურმა შესაბამის რეაგირებამდე გარკვეული დროის განმავლობაში, კიდევ ერთხელ გადაამოწმა აღნიშნული ფაქტები და დამკვიდრებული საერთაშორისო პრაქტიკის გათვალისწინებით, დაელოდა საქმესთან უშუალო შემხებლობაში მყოფი პარტნიორი მხარის მიერ გაკეთებულ ოფიციალურ განცხადებას. როგორც საზოგადოებისთვის ცნობილია, ისეთმა კომპეტენტურმა უწყებებმა, როგორებიცაა ამერიკის შეერთებული შტატების ცენტრალური სადაზვერვო სააგენტო და სახელმწიფო დეპარტამენტი, თავადვე ეჭვქვეშ დააყენეს შემოთავაზებული ჟურნალისტური გამოძიების შედეგების რეალურობა და არ დაადასტურეს ჟურნალისტების მიერ გამოქვეყნებული ფაქტების არსებობა არა მარტო საქართველოში 2021 წელს, არამედ სხვადასხვა წელს მსოფლიოს სხვადასხვა ქვეყანაში, მათ შორის, გერმანიაში, ავსტრიაში, პოლონეთში, კუბაში და სხვ.
საქართველოს სახელმწიფო უსაფრთხოების სამსახური აღნიშნულ რეაგირებას სავსებით ამომწურავად მიიჩნევს, რითაც სრულად დაკმაყოფილდა საზოგადოების ინტერესი და თვლის, რომ არსებული ვერსიის უსაფუძვლობის ხელახლა მტკიცება საჭირო არ არის.
სამწუხაროა, რომ ამერიკელი პარტნიორების მხრიდან ამომწურავი განმარტების მიუხედავად, საქართველოში მაინც აღმოჩნდნენ პოლიტიკურად ანგაჟირებული ცალკეული პირები და მედიასაშუალებები, რომლებიც შეეცადნენ ეს საკითხი, როგორც ყოველთვის, გამოეყენებინათ სპეკულაციებისთვის და სახელმწიფო უსაფრთხოების სამსახურის დისკრედიტაციის მცდელობისთვის.
აქვე გვსურს საზოგადოება დავარწმუნოთ, რომ რეგიონში მომატებული გამოწვევების ფონზე უსაფრთხოება ქვეყანაში დაცულია მაქსიმალურ დონეზე, რაც გამოიხატა კიდეც ბოლო წლების მშვიდობიან თანაცხოვრებაში,” – ნათქვამია სუს-ის განცხადებაში.
შეგახსენებთ, რომ “ჰავანის სინდრომი” (“ჯანმრთელობის ანომალიური ინციდენტები”) პირველად საზოგადოების ყურადღების ცენტრში 2017 წელს მოექცა მას შემდეგ, რაც კუბაში 20-ზე მეტი ამერიკელი ოფიციალური პირი ჰავანში ცუდად გახდა აქამდე დაუდგენელი მიზეზებით. ამის შემდეგ 100-ზე მეტი შემთხვევა დაფიქსირდა ისეთ ადგილებში, როგორიცაა გუანჯოუ (ჩინეთის ქალაქი) ან თუნდაც ვაშინგტონი. მსგავსი შემთხვევა 2014 წელს ფრანკფურტშიც დააფიქსირეს.