ოლექსანდრ სირსკი, რომელმაც ვალერი ზალუჟნი ჩაანაცვლა, უკრაინის გმირია, მას გენერლის წოდება აქვს და გუშინდელ დღემდე უკრაინის სახმელეთო ჯარების სარდალი იყო.
აღსანიშნავია, რომ სწორედ ოლექსანდრ სირსკის იდეა იყო და მისი უშუალო მონაწილეობით დაიგეგმა და განხორციელდა მოულოდნელი ოპერაცია ხარკოვის მიმართულებით, რომელმაც უკრაინის შეიარაღებულ ძალებს საშუალება მისცა, რუსი ოკუპანტები წინ გაერეკათ, დასახლებები ელვისებური სისწრაფით გაეთავისუფლებინათ და დაკარგული ტერიტორიის მნიშვნელოვანი ნაწილი დაებრუნებინათ.
უკრაინის პრეზიდენტმა ვოლოდიმირ ზელენსკიმ შეიარაღებული ძალების სარდლად გენერალი ოლექსანდრ სირსკი წარადგინა.
ეს მას შემდეგ მოხდა, რაც პრეზიდენტი ზალუჟნის შეხვდა, უკრაინის ორწლიანი დაცვისთვის მადლობა გადაუხადა და მასთან ერთად განიხილა ახალი სარდლის კანდიდატურები. ზელენსკი ამბობს, რომ ზალუჟნის მის გუნდში დარჩენა შესთავაზა.