თურქეთში საქართველოს საელჩოს ინფორმაციით, მიწისძვრის შემდეგ დაკარგული საქართველოს 6 მოქალაქიდან ოთხი იპოვეს. ელჩი “მთავარ არხთან” ამბობს, რომ ორი ადამიანის ძებნა ისევ გრძელდება. არსებული ინფორმაციით, ისინი ნანგრევებში არიან მოყოლილები.
“6 მოქალაქიდან 4-ის ადგილსამყოფელს მივაკვლიეთ, სამწუხაროდ, 2 მოქალაქის ძიება გრძელდება. ის ორი მოქალაქე, რომლებიც ნანგრევებში აირან მოყოლილები. ჩვენ გვაქვს რეგულარული კონტაქტი სამაშველო სამსახურებთან თურქეთში, რაზეც პასუხს ვიღებთ, რომ გრძელდება სამაშველო-სამძებრო ოპერაცია. იქ ორი კორპუსია ჩამონგრეული, ორივე შემთხვევაში და იქ არიან მოყოლილები”, – თქვა ელჩმა, გიორგი ჯანჯღავამ.
ორშაბათს დილით მომხდარი მიწისძვრის შედეგად თურქეთსა და სირიაში 9 400-ზე მეტი ადამიანი დაიღუპა. ათასობით ადამიანი დაშავებულია. საერთაშორისო ორგანიზაციები და ქვეყნები ცდილობენ დაზარალებულ ქვეყნებს დაეხმარონ. თურქეთში სამაშველო ჯგუფი და ტექნიკა გაგზავნა საქართველომაც.