რუსეთის ომი უკრაინის წინააღმდეგ მეოთხე ეტაპზე გადავიდა – განაცხადა უკრაინის პრეზიდენტის აპარატის მრჩეველმა ალექსეი არესტოვიჩმა იულია ლატინინასთან ინტერვიუში. არესტოვიჩის თქმით, ომის მეოთხე ეტაპი გაგრძელდება ზამთრამდე, ორ-სამ თვეს.
მისი თქმით, ამ ეტაპს წინ უძღოდა სამი ეტაპი – სრულმასშტაბიანი შეჭრის დაწყებიდან უკრაინის ჩრდილოეთიდან რუსული ჯარების განდევნამდე; ლისიჩანსკისა და სევეროდონეცკის ოკუპაცია; მიკოლაივისა და კრივოი-როგის მიმართულებებით ოკუპანტების მხრიდან წინსვლის წარუმატებელი მცდელობები (10 ივლისიდან 10 აგვისტომდე).
“ამისთვის [მეოთხე ეტაპი] დამახასიათებელი იქნება ის ფაქტი, რომ მხარეები დადგებიან და თავს დაესხმებიან ერთმანეთს რამდენადაც შეეძლებათ. მაგრამ ჩვენ გვაქვს ბევრად უკეთესი შანსები თავდასხმის, იმ მარტივი მიზეზის გამო, რომ ჩვენ გვაქვს HIMARS, მათ არა,” განმარტა არესტოვიჩმა.
გუშინ, უკრაინის მთავარი სადაზვერვო სამმართველოს ხელმძღვანელმა, კირილ ბუდანოვმა განაცხადა, რომ რუსეთთან ომში გარდამტეხი მომენტი უკვე დაიწყო. ბუდანოვის თქმით, ამის მაგალითია ბოლოდროინდელი რეგულარული აფეთქებები დროებით ოკუპირებულ ყირიმში.