მესამე პრეზიდენტი, მიხეილ სააკაშვილი 6 დღეა სამედიცინო დაწესებულება “ვივა მედში-ში” იმყოფება, თუმცა კლინიკის ადმინისტრაცია მისთვის ჩატარებული გამოკვლევების შედეგებს ამ დრომდე არ ასაჯაროებს. მასთან ისევ არ უშვებენ არც პირად ექიმს და არც ალტერნატიული კონსილიუმის წევრებს.
ექიმები ამბობენ რომ თუ მესამე პრეზიდენტს ხელისუფლება საზღვარგარეთ სამკურნალოდ მალე არ გაიყვანს, შესაძლოა უმძიმესი შედეგი დადგეს.
“6 დღეა იგი იმყოფება ვივა მედის კლინიკაში და უცნობია როგორც დიაგნოზები, ასევე, მკურნალობის კურსი და შემდგომი ტაქტიკა, უცნობია არა მარტო საზოგადოებისათვის, არამედ რამდენადაც ჩემთვის ცნობილია მისი ოჯახისთვის, რა თქმა უნდა, ცენტრ “ემპათიას” და ექსპერტებს არ მიეწოდება არანაირი ინფორმაცია. ეს არის განზრახ, უვიცობით თუ კანონდარღვევით შექმნილი ვითარება იუსტიციის სამინისტროს მხრიდან”, – თქვა “ემპათიას” ხელმძღვანელმა, მარიამ ჯიშკარიანმა.
მისივე თქმით, ერთადერთი დამოუკიდებელი გზა მიხეილ სააკაშვილის გადარჩენისთვის, არის მისი საზღვარგარეთ გაყვანა.
ამასთან, ექიმი ლალი ჯავაშვილი ამბობს, რომ ნებისმიერი ტიპის კვლევისთვის 5 დღე საკმარისია. მანვე აღნიშნა, რომ მიხეილ სააკაშვილს ამ დღეების განმავლობაში საკვების სახით არაფერი მიუღია: “პრაქტიკულად არის მშიერი. ერთი კვირის განმავლობაში მას არაფერი მიუღია საკვების სახით. ალბათ კვებავენ პარენტერალურად, ანუ საკვები სითხეები მას გადაესხმება ვენაში”.