სოციალურ ქსელში გამოხმაურებები პოეტ თემურ ელიავაზე და მის მეგობრებზე გადაღებული სიუჟეტი რეკორდებს ხსნის.
,,ვერ ვიტყვი, არ გამიკვირდა-მეთქი, როცა გავიგე, რომ პოეტი თემურ ელიავა, ზუგდიდელ მომღერალ ბუბა სორდიასთან ერთად, უკრაინაში წავიდა და მოქმედ მოხალისეთა ბატალიონ “ქართულ ლეგიონს” შეუერთდა. – წერს ჟურნალისტი ნატო კორსანტია
თუმცა მალევე მივხვდი, რატომ უნდა გამკვირვებოდა ეს ნაბიჯი იმ ახალგაზრდა კაცისგან, რომელიც 18 წლისა ერთ დღეს ყველასთვის მოულოდნელად სოხუმში წავიდა და წითელ ხიდთან, ჯანაშიას ექვს ნომერში თავის მშობლიურ სახლს მიადგა. თემური ხუთი წლისა იყო, როცა აქედან წამოვიდა ოჯახთან ერთად.
„მივედი ჩემს სახლთან, სადაც უკვე სხვები ცხოვრობდნენ და მასპინძელს ვუთხარი, გამარჯობა, მე აქ დავიბადე, აქ ვცხოვრობდი და თუ შეიძლება, ხუთი წუთით შემომიშვით, სახლს დავათვალიერებ-მეთქი“… არაო, არ შეუშვეს და მკაცრადაც აუხსნეს, რატომაც არა…, მაშინ „ციდან დავეშვი და ამის შემდეგ სოხუმში არ წავსულვარო,“ – ამბობს თვითონ.
ახლა კი თემურ ელიავა უკრაინაშია, რადგან სჯერა, რომ „სოხუმში წასვლის“ ამბავიც ახლა „აქ წყდება“.
გავრცელებულ სიუჟეტში პოეტი თემურ ელიავა უკრაინაში მებრძოლ ქართველებს პატრიოტულ „კოლხის ლექსს“ მისებური განუმეორებელი ემოციით უკითხავს. კადრში ჩანს როგორი ანთებულები არიან მოხალისეებიც…
გამარჯვებით შინ მშვიდობით დაბრუნება ვუსურვოთ ყველას!