“ეს ჩვენი ომია! თუ უკრაინა დამარცხდება დამარცხდება საქართველოც”- აცხადებენ უკრაინაში მებრძოლები. ქართველ ჯარისკაცებს ახლა უკრაინაში განსაკუთრებული მისია აქვთ. კიევში, რომლის აღებაც პუტინის სანუკვარი ოცნებაა, რუსეთის პრეზიდენტის შეგზავნილ დივერსანტებს ეძებენ და აკავებენ.
ისინი“ტვ პირველს” უყვებიან, რომ რუსული და ბელორუსული პასპორტის მქონე დივერსანტების განეიტრალება მთავარი ამოცანაა ქუჩაში სამოქალაქო ტანსაცმელში ან უკრანული ჯარის უნიფორმაში გადაცმული დივერსანტები შეუმჩნეველი არ დარჩეთ.
ლევან ფიფია ერთ-ერთია, ვინც ჩხრეკის ოპერაციას ატარებს. ამბობს, რომ რუსეთს უკრაინაში სხვადასხვა ეროვნების ხალხი ჰყავს შეყვანილი, რომლებიც საარტილერიო ცეცხლისთვის ნიშნავენ ადგილებს.
ლევან ფიფიას ოჯახი აფხაზეთიდანაა, მისმა მშობლებმა ყველაზე კარგად იციან რას ნიშნავს რუსული სისასტიკე.
ირკვევა, რომ ლევანი 2 წლინახევრის იყო, მისი და ხუთის, როცა აფხაზეთის ომი დაიწყო, შვიდი თვე ოჩამჩირეში, სოფელ ჯალში სრულ ბლოკადაში იყვნენ.
“საშიში მდგომარეობა გვქონდა. ყანაში ვაძინებდი ბავშვებს. ჩალას ვაფენდი ზევიდან. არაფერი გვქონდა. დილას სახლში ვბრუნდებოდით”- ამბობს ქართველი მეომრის დედა იზო ჩარგაზია. მისი თქმით, უკრაინაში შეჭრილი რუსული არმიის კადრებმა, აფხაზეთი გაახსენა, იქაც ყველაფერი ასე იყო.
“ძალიან ჰყავს ეს ყველაფერი იმას რაც გამოვიარეთ. სულ ვიყავით ჩემოდნებზე. სად მივდიოდით არ ვიცოდით. ეგრეა დღეს, საწყალი უკრაინა. ლევანი მომყავდა “კალიასკით”, თეა ფეხით. ისეთი სიმწარე გამოიარეს. იყო ზამთარი, თოვლი, ორი დღე-ღამე მოვდიოდით 18 ადამიანი”- იხსენებს ლევანის დედა.
კიდევ ერთი ქართველი, რომელიც უკრაინას იცავს, დათო ქუქჩიშვილია. მებრძოლი “შაბათის ეთერს” უყვება, რომ უკან დახევას არ აპირებენ და ქალაქს ბოლომდე დაიცავენ.
“ქართველს უკან დახევა არ სჩვევია, და არც დავიხევთ სანამ შეგვეძლება. როცა ძალა გამოგველევა, მერეზე მერე ვილაპარაკოთ. გაუძელით ყველამ”- ამბობს ის.