რუსული პროპაგანდისტული მედია ისევ აგრძელებს დეზინფორმაციის გავრცელებას. დღეს საღამოს გავრცელებული ფეიკის შემდეგ, სადაც ნათქვამი იყო, რომ ვოლნოვახთან მიმდინარე შეტაკებების დროს ქართველი დაქირავებული მებრძოლები მოკლეს, ე.წ. დონეცკის სახალხო რესპუბლიკის სამხედო ოლქის პრესსამსახურის უფროსი ედუარდ ბასურინი ავრცელებს ინფორმაციას, თითქოს მოიპოვეს მტკიცებულება, რომ დონბასში ქართველი დაქირავებული მებრძოლები არიან.
ამის დასამტკიცებლად ბასურინმა წარმოადგინა ჩაფხუტი და ჯავშანჟილეტი, რომლის სამკერდე ნიშანზე აღნიშნულია გვარი გოგუა. ბასურინი აცხადებს, რომ მსგავს მტკიცებულებებს კიდევ წარადგენენ.
აღნიშნული ინფორმაცია, დიდი ალბათობით, ფეიკია და არაფრით ადასტურებს ამავე მხარის მიერ გავრცელებულ ინფორმაციას, ვოლნოვახთან მინიმუმ, 15 ქართველი მებრძოლის ლიკვიდაციის შესახებ.
არ არის წარმოდგენილი არც ფოტო, არც ვიდეომტკიცებულება, თავად ჩაფხუტსა და ჯავშანჟილეტს კი ბრძოლის ველზე ყოფნის კვალი არ ეტყობა.
შეგახსენებთ, ქართველი მებრძოლების თითქოსდა განადგურების შესახებ რუსულ მედიაში დღეს გავრცელებული ინფორმაცია უარყვეს უკრაინაში მებრძოლი ქართველებით დაკომპლექტებული ჯგუფის იმ წევრებმა, რომლებსაც უშუალოდ “ოდიშინიუსი” ესაუბრა.
ქართველი მებრძოლების ალყაში მოქცევა და განადგურება არ დასტურდება – ნახეთ დეტალები