«Россия 1»-ის ეთერში გავრცელებული ინფორმაცია იმის შესახებ, რომ უკრაინაში, კერძოდ, ვოლნოვახთან, 60-დე ქართველი დაქირავებული მებრძოლი ალყაში მოაქციეს და მათი მესამედი უკვე განადგურებულია, არ დასტურდება.
ინფორმაცია “ოდიშინიუსმა” უკრაინაში მყოფ ქართველ მებრძოლთა რამდენიმე ჯგუფთან გადაამოწმა, რომლებიც ინფორმაციას უარყოფენ და აცხადებენ, რომ მსგავსი ცნობები რუსეთის პროპაგანდისტული საშუალებების მიერ წარმოებული საინფორმაციო ომის ნაწილია.
“ჩვენი ბიჭები, მათ შორის, ახალჩამოსული მოხალისეები, განაწილებული არიან სხვადასხვა ლოკაციაზე, მათთან არის მუდმივი კომუნიკაცია და მსგავსი შემთხვევა, რომ რომელიმე ჯგუფი ალყაში მოხვდა, ან ტყვედ ჩავარდა, ან განადგურებულია, არ გვქონია.
რაც შეეხება ვოლნოვახს, შემიძლია გითხრათ, რომ ეს ახალი ალყა არ არის, ამ მიმართულებაზე უკვე მეხუთე დღეა, ბრძოლები მიმდინარეობს.
აქ არიან ოფიციალურად უკრაინის შეიარაღებული ძალების წარმომადგენლები და არა რომელიმე ლეგიონის “, – უთხრა “ოდიშინიუსს” ერთერთი ჯგუფის ხელმძღვანელმა, რომლის ვინაობასა და დისლოკაციის ადგილს არ ვასახელებთ. მისივე თქმით, ინფორმაცია კიდევ ერთხელ გადამოწმდება.
შეგახსენებთ, «Россия 1»-ის ეთერში, ჟურნალისტმა სემიონ პეგოვმა განაცხადა, რომ 60 ქართველი ბოევიკიდან 15 განადგურებულია.