ზუგდიდში, საკრებულოს სხდომაზე მისულმა, 2020 წელს ავტოასაგზაო შემთხვევის დროს დაღუპული სუს-ის რეგიონალური სამსახურის ყოფილი ხელმძღვანელის, ენმ-ის წევრის ირაკლი გაწერელიას ცოლმა ფატი შენგელიამ ენმ-ის ერთერთ ადგილობრივ ლიდერს თემურ ბასილაიას წითელი საღებავი შეასხა.
ამ ზომას ფატიმა შენგელიამ მას შემდეგ მიმართა, რაც 2020 წელს მომხდარი ავარიის გამო დაწყებული გამოძიების შემდეგ, სასამართლო სხდომაზე, სადაც ავარიის დეტალები განიხილებოდა, ენმ-ის არცერთი წარმომადგენელი არც ცენტრალური, არც რეგიონალური ოფისიდან არ გამოცხადდა.
“ნამდვილად არ მინდოდა ზუგდიდიდან დამეწყო, მაგრამ ვხედავ, მომიწევს. ხვალ 22 ივნის 14 საათზე, საკრებულოს წინ უნდა შევეგებო მას, ვინც გადააბიჯებს 9 წლიანი ბრძოლის გამო აქ ჩახოცილ, მთელი ცხოვრება თანამდგომ, მებრძოლ, ბიჭებს. (იკა იცი რაო??? სასამართლო პროცესზე კი დაგტოვეთ თქვენი სულები უპატრონოდო, მაგრამ საკრებულოს ვერ დავტოვებთო)”, – დაწერა 21 ივნისს ფატიმა შენგელიამ “ფეისბუქზე”
თემურ ბასილაიას ფატიმა შენგელიასთვის პასუხი არ გაუცია. მან ბოდიში მოიხადა, განაცხადა, რომ ფატიმა შენგელიას სჭირდება თანადგომა, “მათ შორის, ფსიქოლოგიურიც” და საკრებულოს სხდომა “ევროპული საქართველოს” წევრ ბათლომე შელიასთან ერთად დატოვა.
შეგახსენებთ, შემზარავი ავტოავარია თბილისი-სენაკი-ლესელიძის ავტომაგისტრალზე მაშინ მოხდა, როცა ენმ-ის ზუგდიდისა და სამეგრელოს სხვადასხვა ორგანიზაციების წარმომადგენლები, 2020 წლის 29 ოქტომბერს თბილისში ჩატარებული შეკრების შემდეგ შინ ბრუნდებოდნენ. მიკროავტობუსს, სადაც ისინი ისხდნენ, უკნიდან ტრაილერი შეეჯახა. შეჯახების შედეგად ნაციონალური მოძრაობის 6 წევრი გარდაიცვალა, 10-მა მგზავრმა კი სხეულის სხვადასხვა სიმძიმის დაზიანებები მიიღო. გამოძიება საქართველოს სისხლის სამართლის კოდექსის 276-ე მუხლის მე-8 ნაწილით მიმდინარეობდა.