ქვეყანა ივლისიდან მასობრივ ვაქცინაციაზე უნდა გადავიდეს, – ამის შესახებ ზუგდიდში მყოფმა ამირან გამყრელიძემ მას შემდეგ განაცხადა, რაც ჯანდაცვის სფეროს წარმომადგენლებსა და არასამთავრობო ორგანიზაციებს შეხვდა. ის დღეს რუხის მრავალპროფილური საავადმყოფოსა და ენგურის ხიდზე განთავსებულ ტესტირების ოთახსაც ეწვია.
გუბერნატორთან ერთად ჩატარებულ პრესკონფერენციაზე ამირან გამყრელიძემ ჟურნალისტებს ვაქცინაციის საინფორმაციო კამპანიაში აქტიური ჩართვისკენ მოუწოდა.
ამირან გამყრელიძის განცხადებით, საქართველო ვაქცინებით შეუფერხებლად მომარაგდება, ხოლო დეკემბერში, გეგმის მიხედვით, ვაქცინირებულთა რაოდენობამ 65% უნდა შეადგინოს:
“მობილიზებულია ვაქცინების საკმაო რაოდენობა, იცით, რომ ზოგადად გლობალური პრობლემაა ვაქცინების მსოფლიოში, თუმცა, ამ მხრივ მიმდინარეობს მუშაობა და საქართველოც მომარაგდება ამ ვაქცინებით. დეკემბრის ბოლომდე ჩვენ უნდა გვყავდეს დაახლოებით 65 პროცენტი აცრილი. ჩვენ მარტო ვერაფერს გავხდებით და სწორედ ამიტომ ვარ დღეს აქ და ვხვდები რეგიონებში წარმომადგენლებს, რომ ყველა გავერთიანდეთ და მოსახლეობის ინფორმირება მოვახდინოთ”, – განაცხადა გამყრელიძემ ზუგდიდში.