აზერბაიჯანი საზღვარზე დაძაბულობის პროვოცირებას ახდენს, რათა სომხეთის ვადამდელი საპარლამენტო არჩევნების შედეგებზე გავლენა მოახდინოს. ამის შესახებ ფაშინიანმა მისი პარტიის აქტივთან შეხვედრისას განაცხადა.
„საზღვარზე აზერბაიჯანის უკანასკნელი პროვოკაციული ქმედებების მიზანია სომხეთში წინასაარჩევნო პროცესებზე ზეგავლენა. აზერბაიჯანი თავისი პროვოკაციული ქმედებებით ცდილობს მიაღწიოს იმას, რომ არჩევნების კონკრეტული შედეგი დადგეს“, – განაცხადა ფაშინიანმა.
მისი აზრით, ბაქო არ არის დაინტერესებული, მისმა პარტიამ საპარლამენტო არჩევნებში გაიმარჯვოს.
პოლიტიკური კრიზისის ფონზე, რომელიც სომხეთში გასული წლის ნოემბერში დაიწყო, მთავრობა და პარლამენტში წარმოდგენილი პარტიები შეთანხმდნენ, რომ 20 ივნისს ვადამდელი საპარლამენტო არჩევნები უნდა გაიმართოს.