ახლა ჩვენ მივდივართ, რათა კიდევ ერთხელ გამაფრთხილებლად გადავკეტოთ გზა, ამჯერად ფილარმონიასთან, და გავაფრთხილოთ ხელისუფლება, ხვალ ჩვენ ისევ შევიკრიბებით რესპუბლიკის მოედანზე , იქნება სიტყვით გამოსვლები, მერე კი დავბრუნდებით ხეობაში – განაცხადა ხეობის მცველთა ლიდერმა ვარლამ გოლეთიანმა.

მისი თქმით, იუსტიციის სამინისტრომ გამოაქვეყნა 2019 წლის 30 მარტს მიღებული შეფასებითი დოკუმენტი, რომელშიც დაწუნებულია ნამოხვანჰესის კასკადის მშენებლობა, რაც იძლევა იმის თქმის საფუძველს, რომ კომპანიასთან გაფორმებულია ანტისახელმწიფოებრივი ხელშეკრულება.

მისივე თქმით, იუსტიციის სამინისტროს დასკვნა, რომელიც გასაჯაროვდა, ამხელს ხელისუფლებას “მის მიერ ჩადენილ უკანონობაში”, ამიტომ ისინი ხეობაში ბრუნდებიან, არ ჩაშლიან 26 მაისს დაგეგმილ ღონისძიებებს და ადგილზე შეეწინააღმდეგებიან კომპანია “ენკას” მიერ დაწყებულ სამუშაოებს. აქციის მონაწილეთა მოთხოვნა უცვლელია: გაუქმდეს ხელშეკრულება კომპანია “ენკასთან” და შეწყდეს ნამოხვანჰესის მოსამზადებელი სამუშაოები.

რაც შეეხება იუსტიციის სამინისტროს დასკვნას, რომელიც 2019 წლის მარტშია მიღებული, იქ აღნიშნულია 22 შენიშვნა ხელისუფლების მიმართ, რომელიც აღმასრულებელ ხელისუფლებას უნდა გაეთვალისწინებინა, თუმცა, ეს დასკვნა ამ დრომდე გასაჯაროვებული არ ყოფილა.