გავრცელდა თუ არა ინდური შტამი საქართველოში – პასუხი კითხვაზე რამდენიმე საათში, სავარაუდოდ, დღის ბოლომდე იქნება ცნობილი.
ამ დროისთვის აკვირდებიან რამდენიმე ინფიცირებულს, ხოლო პასუხი კითხვაზე მათი გამოკვლევის შემდეგ გახდება ცნობილი. რაც შეეხება გეგმას, თუ რას უპირისპირებს ხელისუფლება მზარდ ინფიცირებას ან “ინდური შტამის” შესაძლო აღმოჩენას საქართველოში, ჯანდაცვის ექსპერტთა თქმით, ასეთი რამ ბუნებაში არ არსებობს და ხელისუფლებას არა აქვს შემუშავებული კონკრეტული მიდგომა, რა უნდა მოიმოქმედოს იმ შემთხვევაში, თუ შტამი საქართველოში შემოაღწევს.
“ადრე იყო ბრიტანული შტამი და საქართველოში მის შემოსვლაზე ლაპარაკი, ახლა არის ინდური შტამი, მერე სხვა ქვეყნის შტამი იქნება და რა? ამაში პრობლემას ვერ ვხედავ, პრობლემა არის ხელისუფლების გეგმის არარსებობა”, – ამბობს ვახტანგ სურგულაძე, ჯანდაცვის ექსპერტი.
შეგახსენებთ, ინდოეთში კორონავირუსის მასშტაბური მეორე ტალღა აპრილის დასაწყისში, ხალხმრავალი შეკრებების, არასაკმარისი ვაქცინებისა და კორონავირუსის ახალი ვარიანტების გამო დაიწყო, რასაც ჯანდაცვის სისტემის კოლაფსი და სიკვდილიანობის მაჩვენებლის ზრდა მოჰყვა.
აქვე შეგახსენებთ, რომ ვირუსები მუტაციით ხასიათდებიან, ეს პროცესი ბუნებრივად მიმდინარეობს და მუტირებული ვირუსი უფრო ძლიერი ან სუსტი ხდება. Covid-19-ის შემთხვევაშიც ასე მოხდა. მან რამდენიმე მუტაცია განიცადა და ე.წ. “ინდური შტამი” ერთ-ერთი მათგანია.
ამავე თემაზე:
არაავტორიზებულ ვაქცინას რეკომენდაციას ვერ გავუწევთ – ჯანდაცვის ექსპერტები “სინოვაკზე”
17 გარდაცვლილი, 388 ინფიცირებული, 1357 გამოჯანმრთელებული – COVID 19 სტატისტიკა
რუხის კლინიკაში 2 კოვიდინფიცირებული პაციენტი გარდაიცვალა