აშშ-ს ფლოტმა და სანაპირო დაცვამ არაბეთის ზღვაში პატარა ზომის გემი დააკავა, რომლიდანაც დიდი რაოდენობით უკანონო იარაღი ამოიღო.
კრუიზერმა USS Monterey-მ პატარა ზომის გემი, რომელიც არცერთი სახელმწიფოს დროშის ქვეშ არ ცურავდა, 6 მაისს გეგმური ოპერაციების დროს გააჩერა. აშშ-ს სანაპირო დაცვის გუნდი გემის ბორტზე გადავიდა და დიდი რაოდენობით იარაღი აღმოაჩინა.
ამოღებული იარაღმა თითქმის მთლიანად დაფარა 173 მეტრის სიგრძის სამხედრო ხომალდის უკანა ასაფრენი გემბანი. იარაღის აშშ-ს ხომალდზე გადატანას ორი დღე დასჭირდა.
“იარაღში შედიოდა ათობით მოწინავე რუსეთში წარმოებული ტანკსაწინააღმდეგო რაკეტები, ათობით ათასი ჩინური 56-ე ტიპის შაშხანა, PKM ტიპის ასობით ტყვიამფრქვევი, სნაიპერის შაშხანები და ყუმბარმტყორცნები”. – ნათქვამია აშშ-ს ფლოტის განცხადებაში.
აშშ-ს ფლოტის თანახმად, მიმდინარეობს გამოძიება იარაღის წყაროსა და დანიშნულების დასადგენად. იარაღი აშშ-ს მფლობელობაში დარჩება. ფლოტის განცხადების თანახმად, დაკავებული გემის ეკიპაჟი დაჰკითხეს, წყლითა და საკვებით უზრუნველყვეს და შემდეგ გაათავისუფლეს.