დაჭრა ზუგდიდში – ახლობლები პოლიციას ძალადობაში სდებენ ბრალს [Video]

0
1335

შინაგან საქმეთა სამინისტროს აფხაზეთის პოლიციის დეპარტამენტის მიერ ჩატარებული სპეცოპერაციის შედეგად ორი ქართველი დაიჭრა. შემთხვევა საოკუპაციო ხაზთან, ნაფატის მონაკვეთზე გამთენიისას მოხდა.
არსებული ინფორმაციით, მამა-შვილ ძანძავებს პოლიციამ ცეცხლი იმ დროს გაუხსნა, როცა მათ საქართველოს მიერ კონტროლირებად ტერიტორიაზე, მდინარე ენგურის გავლით, კონტრაბანდული სიგარეტი გადმოჰქონდათ. პაპუნა ძანძავას ტყვია ზურგში აქვს მოხვედრილი, ხოლო მამას, ბადრი ძანძავას ფეხში. დაჭრილები კომპაქტურ დასახლებაში ცხოვრობენ, მათი სახლიდან საოკუპაციო ხაზამდე დაახლოებით 700 მეტრია. ბადრი და პაპუნა ძანძავები სასწრაფო დახმარების ბრიგადამ საავადმყოფოში გადაიყვანა. ექიმის ინფორმაციით, შვილის მდგომარეობა შედარებით მძიმეა. მას ტყვია ზურგში აქვს მოხვედრილი. საოკუპაციო ხაზთან ჩატარებული სპეცოპერაციის დეტალებზე დაჭრილი მამა-შვილის ოჯახის წევრები და ახლობლები საუბრობენ. ახლობლები პოლიციას ძალადობაში სდებენ ბრალს. გამომძიებლის ინფორმაციით კი სპეცოპერაციის დროს პოლიციელებიც დაშავდნენ. მისი თქმით, დაზიანებები სამართალდამცველებს მამა-შვილმა ბლაგვი საგნით მიაყენეს. ისინი ქუთაისში ექსპერტიზაზე არიან გადაყვანილი. ზუგდიდის მუნიციპალიტეტის სოფელ ახალაბასთუმანში, პოლიციის მიერ მამა-შვილის დაჭრის ფაქტზე, სახელმწიფო ინსპექტორის სამსახურმა, შინაგან საქმეთა სამინისტროს ცალკეული თანამშრომლების მხრიდან იარაღის გამოყენებით სამსახურებრივი უფლებამოსილების გადამეტების ფაქტზე გამოძიება საქართველოს სისხლის სამართლის კოდექსის 333-ე მუხლის მესამე ნაწილის “ბ” ქვეპუნქტით დაიწყო.

კომენტარის დატოვება

Please enter your comment!
Please enter your name here