დღეს, 12 აპრილს საქართველოს მთავრობამ ბიუჯეტიდან მილიარდ 700 მილიონი ლარის ოდენობის საგარეო ვალი უნდა დაფაროს. სპეციალისტების განმარტებით, ამით 10 წლის წინ აღებული 500 მილიონი დოლარის ძირი დაიფარება, რასაც დაემატება მიმდინარე წლის პროცენტი 34,5 მილიონი დოლარის ოდენობით.
მათი თქმით, ხელისუფლება ვალისთვის საჭირო თანხას ეროვნული ბანკიდან ყიდულობს, რაც კიდევ უფრო შეამცირებს უცხოური ვალუტის რეზერვებს. ეკონომისტები ამბობენ, რომ მთავრობას ამ ვალის დასაფარად ჯობდა ახალი ვალი აეღო, ვიდრე თანხა ბიუჯეტიდან დაეფარა.
ხელისუფლების ოპონენტების მტკიცებით, ეროვნული ვალუტის გაუფასურების გამო მმართველ პარტიას ვალის დაბრუნება 2-ჯერ მეტი თანხით უწევს, რადგან 2011 წელს, ევროობლიგაციების გამოშვების დროს 500 მილიონი დოლარის ღირებულება 832 მილიონი ლარი იყო, ამჟამად კი მილიარდ 700 მილიონ ლარზე მეტია.