32  წელი  გავიდა 1989 წლის 9 აპრილის საშინელი ტრაგედიიდან, რომელსაც თავისუფლებისთვის მებრძოლი უდანაშაულო ადამიანები შეეწირა.

ამ დღესთან დაკავშირებით „ერთიანი ნაციონალური მოძრაობის“ ზუგდიდის ოფისმა პატივი მიაგო ცხრა აპრილს დაღუპულ გმირებს და მემორიალი ყვავილებით შეამკეს.

„ნაციონალური მოძრაობის“ წევრის და ყოფილი უზენაესი საბჭოს წევრის გია მამფორიას თქმით, ბოლო წლები უფრო მეტ ყურადღებას აქცევენ 26 მაისს, მისი აზრით კი, 9 აპრილი მარტო გლოვის დღე კიარა საქართველოს დამოუკიდებლობის დღეცაა, რადგან 9 აპრილს მოეწერა ხელი საქართველოს დამოუკიდებლობის აქტს.

შეგახსენებთ, რომ 1989 წლის 9 აპრილს, გამთენიისას, საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან მშვიდობიანი საპროტესტო აქცია დაარბიეს, რასაც მსხვერპლი მოჰყვა.

შედეგად 21 ადამიანი დაიღუპა, ხოლო ასობით მოქალაქე დაუდგენელი შემადგენლობის გაზით მოიწამლა.