ზუგდიდის ცენტრალური ბულვარის ტერიტორიაზე აქცია ,,ათასი მშობლის მარში’’ გაიმართა. აქციის მთავარი მოთხოვნებია 100 დღის ვადაში სახელმწიფომ მიიღოს კანონი, რომელიც შეცვლის სისხლის სამართლის კოდექსში გაუპატიურების მუხლს, შეიქმნას პროკურატურაში სპეციალიზებული დეპარტამენტი, გახდეს სქესობრივი განათლება ფორმალური განათლების ნაწილი, გაიზარდოს ფსიქოლოგებისა და სოციალური მუშაკების რაოდენობა. აქცია ქობულეთში მომხდარ სექსუალურ ძალადობას უკავშირდება, რის შედეგადაც 14 წლის მოზარდმა თავი მოიკლა. აქციის ერთ-ერთი მოთხოვნა სწორედ იმ პროკურორის პასუხისმგებლობის საკითხს ეხება, რომელიც გარდავცლილი 14 წლის გოგოს საქმეს იძიებდა.
აქცია საქართველოს მასშტაბით პარალელურად სხვადასხვა ქალაქშიც გაიმართა. აქტივისტები მოთხოვნის შესასრულებელ ვადად 100 დღეს ასახელებენ, ამ დროის განმავლობაში კი აქციები პერმანენტულად მოეწყობა.