26 დეკემბერს, გვიან ღამით თელავის რაიონის სოფელ იყალთოში, ვ.ზ.-მ ურთიერთშელაპარაკების ნიადაგზე, შურისძიების მოტივით, ცეცხლსასროლი იარაღის გამოყენებით, განზრახულად მოკლა ზ.ს. შემთხვევის ადგილზე ასევე ურთიერთშელაპარაკებისას ხელის არეში დაიჭრა ლ.ბ”.შ
მკვლელობა ერთერთი ადგილობრივი მცხოვრების, დავით ლაჩაშვილის, სახლში, დაბადების დღის წვეულების შემდეგ მოხდა
მოკლული თელავის ცენტრალური საავადმყოფოს დირექტორია. საქმეზე დაკავებულია კახეთის პოლიციის დეპარტამენტის თელავის რაიონული სამმართველოს უფროსის მოადგილე. დაკავებული პოლიციელი ბრალის ოფიციალურად წარდგენის მოლოდინშია
პროკურატურის ინფორმაციით, სისხლის სამართლის საქმეზე გამოძიება კახეთის საოლქო პროკურატურის საგამოძიებო სამმართველოში, სისხლის სამართლის კოდექსის 108-ე მუხლით მიმდინარეობს.
დღესვე ქვეყანაში გაზრდილი კრიმინალი სამოქალაქო აქტივისტებმა შინაგან საქმეთა სამინისტროსთან გააპროტესტეს.
აქციის მონაწილეებმა ხელისუფლებას თელავში მომხდარი მკვლელობა და სხვა გამოუძიებელი საქმეები შეახსენეს და თქვეს, რომ პოლიციამ საქართველოში საზოგადოებრივი წესრიგის დამცველის ფუნქცია დაკარგა, რადგან ხალხის ნაცვლად, მხოლოდ ბიძინა ივანიშვილის უსაფრთხოებაზე ზრუნავს.
“შსს, იმის ნაცვლად, რომ ზრუნავდეს ადამიანის უსაფრთხოებაზე, თვითონ გახდა კრიმინალი. გუშინ თელავის პოლიციის უფროსის მოადგილემ მოკლა ერთი ადამიანი და დაჭრა მეორე. ამ სისტემის ხელმძღვანელი დაკავებული არის ოლიგარქის უსაფრთხოებით, ხოლო მისი თანამშრომლები გადასული არიან ადამიანების ხოცვაზე”, – ამბობს აქციის მონაწილე, ალიკა კუპრავა.