გალის რაიონის სოფელ ჭუბურხინჯში, 55 წლის გია გუნია გარდაცვლილი იპოვეს. ის საქართველოს მოქალაქეა, რომელიც ზუგდიდში ცხოვრობდა, თუმცა, ამჟამად ოკუპირებულ აფხაზეთში, საკუთარ სახლში იმყოფებოდა. ერთერთი ვერსიით, გუნიას მაღალი სიჩქარით მოძრავი მანქანა იმ დროს დაეჯახა, როცა გზაზე გადადიოდა. ხოლო ცხედარი კვალის დაფარვის მიზნით, სოფელ ჭუბურხინჯთან, რუსების ბაზასთან ახლოს მდებარე არხში ჩააგდეს.
შემთხვევა გალი-ჭუბურხინჯის ცენტრალურ გზაზე გუშინ ღამე მოხდა. ოჯახი მომხდარის დეტალებზე არ საუბრობს, რადგან ცხედრის გადმოსვენებისთვის საჭირო სპეციალური საშვი, შესაძლოა, ვერ მიიღონ.
55 წლის გია გუნიას ცხედარი ადგილობრივმა შემთხვევით მაშინ იპოვა, როცა საქონელს ეძებდა. გარდაცვლილს მანქანის დაჯახების კვალი ეტყობოდა. მომხდარზე დე ფაქტო შსს-მ გამოძიება დაიწყო. დაკავებულია სავარაუდო დამნაშავეც.