ხობის მუნიციპალიტეტის  სოფელ პირველ მაისში ესტატე შუშანიას სახელობის საჯარო სკოლის 24 პედაგოგი დანებებას არ აპირებს და ისინი დირექტორის კობა კვიკვინიას უფლებამოსილების შეჩერებას აპროტესტებენ. პედაგოგები  აცხადებენ,რომ კვიკვინიამ წინასაარჩევნოდ ხელისუფლების დავალება არ შეასრულა, უფრო კონკრეტულად კი მას უნდა ემუშავა პედაგოგებზე და მშობლებზე მმართველი პარტიის კანდიდატის ირაკლი ხახუბიას სასარგებლოდ. პედაგოგები ასევე ამბობენ,რომ კობა კვიკვინიამ ქართული ოცნების წევრის,პარლამენტარ დაჩი ბერაიას ბიუროში სია ვერ წარადგინა,რის გამოც იგი შტაბში დაიბარეს,სადაც არ მივიდა. თავად დირექტორი აცხადებს,რომ იგი აპოლიტიკური პიროვნებაა და 6 წლის მანძილზე არცერთი პარტიის სასარგებლოდ არ უმუშავნია.  სოფლის რწმუნებულმა განაცხადა,რომ მან მართლაც დაურეკა სკოლის დირექტორს,თუმცა მისი ინტერესი იყო მისი გათავისუფლების მიზეზები  ეკითხა.

ხობში დაჩი ბერაიას ბიუროში აცხადებენ,რომ შტაბიდან კვიკვინიასთვის არავის დაურეკავს და მისი მისამართით ზეწოლას ადგილი არ ჰქონია. სკოლის დირექტორს პედაგოგები სრულ მხარდაჭერას უცხადებენ და ამბობენ,რომ სიმართლის გარკვევას ითხოვენ და სხვა დირექტორი სკოლაში არ სურთ. კობა კვიკვინიას ხელშეკრულება მიმდინარე წლის 10 ოქტომბერს შეუწყდა.