55 წლის მონადირე, ომარ ქანთარია, რომელსაც წალენჯიხის რაიონის სოფელ ხოკოს მთებში იარაღი გაუვარდა და დაიჭრა, ტყიდან გამოყვანისას დაიღუპა.
მონადირე მუცლის არეში იყო დაჭრილი. მას შემდეგ, რაც იარაღი გაუვარდა, 112-ში თავად დარეკა. სამაშველო სამსახურმა ადგილზე ვერტმფრენი გაგზავნა, თუმცა მთებში ძლიერი ნისლისა და ცუდი ხილვადობის გამო, ვერტმფრენმა დაჯდომა ვერ მოახერხა. ამის შემდეგ სამაშველო სამსახურმა მიიღო გადაწყვეტილება, რომ მაშველები ფეხით ასულიყვნენ მთაში და დაჭრილი საკაცით ჩამოეყვანათ.
55 წლის მონადირის ჯანმრთელობის მდგომარეობა მაშველების ადგილზე მისვლისთანავე მძიმე იყო. როგორც უწყებაში ამბობენ, მთიდან მის ჩამოსვენებას კიდევ 3 საათი დასჭირდება. სამაშველო სამსახური სხვა დეტალებზე კომენტარს არ აკეთებს.
ოჯახის ინფორმაციით, ომარ ქანთარია წლებია, რაც მონადირეა, ტყეში ყოველთვის დადიოდა, იარაღსაც კარგად ფლობდა. ჰყავს თუ არა ფაქტს თვითმხილველი, უცნობია.