ჯანდაცვის სამუშაო ჯგუფმა ქვეყანაში კორონავირუსის პანდემიასთან დაკავშირებით შექმნილ მდგომარეობაზე მიმართვა გაავრცელა. მათ ხელისუფლებას სიტუაციის დასასტაბილურებლად რეკომენდაციებიც მისცეს.
“ყველაზე დიდი პრობლემა რაც დღეს არის, ესაა პროცესების მართვა. გარედან მაყურებელი ადამიანისთვის აღქმული არაა პროცესი როგორ უნდა იყოს დაგეგმილი და განხორციელდეს. სიტუაციას მივყვებით, გართულების შესაბამისად ვცდილობთ გადაწყვეტილებებით რაღაც გამოვასწოროთ იმის მაგივრად, რომ სრული წარმოდგენა გვქონდეს პროცესი როგორ იმართოს”, – ამბობს ჯანდაცვის ექსპერტი, ქეთევან ჩხარტიშვილი.
ჯანდაცვისა და სოციალური პოლიტიკის კვლევების ცენტრის დირექტორის, სერგო ჩიხლაძის თქმით, სიკვდილიანობის მაჩვენებლითაც ერთ სულ მოსახლეზე მსოფლიოში უკვე მე-16 ადგილზე ვართ.
“გასაგებია, რომ საწოლფონდი არ არის საკმარისი რადგან წინა 6-7 თვე მაქსიმალურად უნდა ყოფილიყო მთავრობის მიერ გამოყენებული და სამწუხაროდ, არ იქნა გამოყენებული, დამატებით თანხებზე და საწოლფონდზე მთავრობა მხოლოდ ოქტომბერში ამოქმედდა”, – ამბობს ის.
ექსპერტები ამბობენ, რომ ახლა ქვეყანას რთული მომენტი აქვს და მნიშვნელოვანია, რომ ეროვნული უსაფრთხოების მთავარი საკითხი სოწორედ კორონავირუსთან ბრძოლა იყოს.
ბოლო 24 საათში საქართველოში კორონავირუსით ინფიცირების 3 117 ახალი შემთხვევა დადასტურდა, 3 638 ადამიანი გამოჯანმრთელდა, ხოლო 45 პაციენტი გარდაიცვალა.
შეგახსენებთ, რომ კორონავირუსის პირველი დადასტურებული შემთხვევა საქართველოში 26 თებერვალს გამოვლინდა.
ბოლო მონაცემებით, მსოფლიოში ინფიცირებულთა საერთო რაოდენობამ 55 მილიონს გადააჭარბა მათგან გამოჯანმრთელდა 38 მილიონი ადამიანი და გარდაიცვალა 1,3 მილიონზე მეტი.