ხმაურისა და დაპირისპირების ფონზე გაიმართა ზუგდიდის 67-ე საოლქო საარჩევნო კომისიის შემაჯამებელი სხდომა. შენობასთან აქცია გამართეს ოპოზიციურმა პარტიებმა, მათმა მხარდამჭერებმა და მოქალაქეებმა, რომლებიც აცხადებენ, რომ ოლიგარქმა ბიძინა ივანიშვილმა მათ არჩევნები მოპარა და გაუყალბა. აქციის მონაწილეებს ხელში ეჭირათ პლაკატები და ასევე მათ საოლქოს შენობასთან მიიტანეს ე.წ. ძველი საანგარიშო, ნიშნად იმისა, რომ კომისია ვერ ითვლის ხმებს და ყველა ოქმში დისბალანსი ჯდება. აქციის მონაწილეები ამბობენ, რომ ოპოზიციური პარტიების ერთობა არის შესაშური და ისინი არ დათმობენ გაყალბებულ არჩევნებს.
აქციის მონაწილეებს ადგილზე დახვდა პოლიცია, სამართალდამცავებმა მათ შენობაში შესვლის საშუალება არ მისცეს. ისინი ითხოვდნენ, საოლქო კომისიის თავმჯდომარისთვის გადაეცათ საანგარიშო. პოლიციელების კორდონის გარღვევის მცდელობისას მცირე ინციდენტიც მოხდა. პოლიციელები აგრესიულობით გამოირჩეოდნენ აქციის მონაწილეების მიმართ, თუმცა მათ მაინც შეძლეს შენობის წინ, ხეზე საანგარიშოს ჩამოკიდება
აქციის მონაწილეებს არა, თუმცა საოლქო კომისიის თავმჯდომარე მედიას შეხვდა და აქციის მონაწილეთა პრეტენზიებს უპასუხა. მირანდა მესხის თქმით, ცდომილება იმდენად უმნიშვნელოა, რომ არჩევნების შედეგებზე გავლენას ვერ მოახდენდა
შეგახსენებთ, რომ დღეს 15:00 საათზე, საქართველოს მასშტაბით, საოლქო საარჩევნო კომისიებმა შემაჯამებელი სხდომა გამართეს, რაც ოპოზიციიამ ყველა ქალაქში გააპროტესტა.