ეუთოს საპარლამენტო ასამბლეის პრეზიდენტმა და ევროპული საქართველოს წევრმა, გიგი წერეთელმა, ბელარუსის ოპოზიციის ლიდერთან, სვეტლანა ტიხანოვსკაიასთან ონლაინშეხვედრა გამართა.
წერეთლის თქმით, დღეს ბელარუსში მიმდინარე მოვლენები საერთაშორისო თანამეგობრობის ყურადღების ცენტრშია და ეუთოსთვის ერთ-ერთ მთავარ პრიორიტეტს წარმოადგენს დაეხმაროს ბელარუს ხალხს ვითარების განმუხტვასა და დიალოგის დაწყებაში. იგი აღნიშნავს, რომ ბელარუსში არსებული ვითარება უნდა იყოს გაკვეთილი ხელისუფლებებისთვის, რომელიც ეცდება არჩევნებზე ხალხის ნების წინააღმდეგ წასვლას.
“ვისაუბრეთ იმ გამოსავალზე, რაც შეიძლება ამ მდგომარეობიდან იყოს, ოპოზიციის შეხედულებებზე და, რა თქმა უნდა, მიუღებლობაზე იმისა, რომ ძალიან ბევრი ლიდერი და სამოქალაქო საზოგადოების ძალიან ბევრი წარმომადგენელი დღეს ან დაპატიმრებულია, ან ქვეყნიდან არის გაძევებული. ის ვითარება, რაც ბელარუსშია, ძალიან საინტერესოა, როგორც გაკვეთილი ხელისუფლებებისათვის, ვინც ეცდება, რომ არჩევნებზე ხალხის ნების წინააღმდეგ გადადგას ნაბიჯები”, — განაცხადა გიგი წერეთელმა.
ბელარუსში ჩატარებული საპრეზიდენტო არჩევნების შემდეგ ქვეყანა საპროტესტო აქციებმა მოიცვა. მოქალაქეები ალექსანდრ ლუკაშენკოს კვლავ გაპრეზიდენტებას აპროტესტებენ და არჩევნების თავიდან ჩატარებას მოითხოვენ. არჩევნების შედეგებს არ აღიარებს გაერთიანებული ოპოზიციის კანდიდატი სვეტლანა ტიხანოვსკაია, რომელიც შედეგების გამოცხადების შემდეგ იძულებული იყო, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.
ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ. ასევე, ევროკავშირს მოუწოდეს, რომ ლუკაშენკოს ეკონომიკური სანქციები დაეკისროს