ზუგდიდში მოსახლეობამ ნაგავსაყრელზე არსებული ანტრისანიტარიის გამო საპროტესტო აქცია გამართა. შეკრებილებმა გზა გადაკეტეს და ნაგვით დატვირთული ,,ზუგდიდდასუფთავების,, მანქანები არ გაატარეს. აქციის მონაწილეების თქმით, ნაგავსაყრელის ტერიტორიისა და მისი შემოგარენის სპეციალური ხსნარით დამუშავება არ ხდება, რაც ქმნის ანტისანიტარიას. აქციის მონაწილეებმა დაპირება მიიღეს, რომ სამშაბათს მათ ნაგავსაყრელის მყარი ნარჩენების მართვის სამსახურის წარმომადგენელი შეხვდებოდა, ამიტომ ადგილობრივებმა გზა მალევე გახსნეს, თუმცა აქციებს აანონსებენ. ” აქ სრული ანტისანიტარიაა, ბუზებით სავსეა, უპატრონო ძაღლები, სუნი, ყველაფერი გვაწუხებს და არავინ არ გვაქცევს ყურადღებას, არ იწამლება ტერიტორია, წესები არა აქვთ დაცული მანქანებს, ისე მიაქვთ ნაგავი და უკვე აუტანელია ეს ყველაფერი. სამშაბათიო გვითხრეს და ვნახოთ, დაველოდებით სამშაბათს და თუ ისევ არ მოგვაქცევენ ყურადღებას, მთელი სოფელი გამოვა და გადავკეტავთ ცენტრალურ გზას”- უთხრეს “ოდიშინიუსს” აქციის მონაწილეებმა. ადგილზე იმყოფებოდნენ სამართალდამცავებიც.